Misli Premyer Liqasının XXI turunda daha bir oyun keçirilib.
Sportnet.az-ın məlumatına görə, günün ikinci qarşılaşmasında “Neftçi” “Sumqayıt”ı sınağa çəkib.
“Gənclik şəhəri” təmsilçisi güclü rəqibinə bir hissə müqavimət göstərə bilib. “Ağ-qaralar” ikinci hissədə vurduğu qollarla 2:0 hesablı qələbə qazanıb. Paytaxt klubunun heyətində Solomon Kverkveliya (54-cü dəqiqə) və Mateus Saldanya (64) fərqləniblər.
Qələbə sayəsində xallarının sayını 44-ə çatdıran “Neftçi” turnir cədvəlinin 3-cü pilləsindəki mövqeyini bir qədər də möhkəmlədib. Laurentsiu Regekampfın yetirmələri artıq ən yaxın izləyiciləri “Zirə”ni 12 xal qabaqlayırlar. “Sumqayıt” isə aktivindəki 15 xalla səkkizinci yerdə qərarlaşıb.
Qeyd edək ki, turun bundan əvvəlki oyunlarında “Kəpəz” “Qarabağ”la (1:1), “Zirə” “Qəbələ” (2:2) ilə heç-heçə edib. Fevralın 6-da “Şamaxı” – “Turan Tovuz” və “Sabah” – “Səbail” görüşləri keçiriləcək.
------------------------------------------
Misli Premyer Liqasında XXI turun daha bir oyunu keçirilib.
Sportnet.az-ın məlumatına görə, turnir cədvəlində “qonşu” olan “Zirə” və “Qəbələ” birincilərin meydanında üz-üzə gəliblər.
UEFA Konfrans Liqasına vəsiqə verən 4-cü yer uğrunda mübarizədə əsas rəqib sayılan komandaların dueli bol qollu alınıb. “Qəbələ” Rafael Utziqin erkən qolu (2-ci dəqiqə) sayəsində hesabı açsa da, çox keçmədən ev sahibləri bərabərlik topunu vurublar. Dmitrios Çantakias 14-cü dəqiqədə fərqlənib.
Tərəflər ikinci hissədə də hərəyə bir dəfə rəqib qapısına yol tapıblar. Əvvəlcə Loris Broqno 57-ci dəqiqədə bakılıları önə keçirib. Ancaq matçda son nöqtəni 77-ci dəqiqədə Felipe Santos qoyub – 2:2. Nəticədə komandalar hərəyə 1 xalla kifayətləniblər.
Hazırda “Zirə” 32 xalla turnir cədvəlinin dördüncü, “Qəbələ” isə 27 xalla beşinci pilləsində qərarlaşıb.
Qeyd edək ki, turun açılış oyununda “Kəpəz”lə “Qarabağ” heç-heçə (1:1) ediblər. Bu gün “Neftçi” – “Sumqayıt”, fevralın 6-da isə “Şamaxı” – “Turan Tovuz” və “Sabah” – “Səbail” görüşləri keçiriləcək.
--------------------------------------------
Bu gün Misli Premyer Liqasında XXI turun daha iki oyunu keçiriləcək.
Sportnet.az-ın məlumatına görə, hər iki matçda paytaxt klubları bölgə təmsilçilərini qəbul edəcəklər.
İlk olaraq “Zirə” ilə “Qəbələ” meydana çıxacaq. Bu komandalar Konfrans Liqasına vəsiqə verən 4-cü yer uğrunda mübarizədə əsas rəqiblər sayılırlar. “Qəbələ” səfərdə qalib gələcəyi təqdirdə, rəqibi ilə xal fərqini 2-yə endirəcək.
Bu görüşün ardından “Neftçi” “Sumqayıt”ı sınağa çəkəcək. Son 7 görüşdə rəqibini məğlub edə bilməyən “Sumqayıt” iki illik tilsimi qırmağa çalışacaq.
Hazırda “Neftçi” 41 xalla üçüncü, “Zirə” 31 xalla dördüncü, “Qəbələ” 26 xalla beşinci, “Sumqayıt” isə 15 xalla səkkizinci yerdə qərarlaşır.
Misli Premyer Liqası
XXI tur
5 fevral
16:00. “Zirə” – “Qəbələ” - 2:2
Qollar: Dmitrios Çantakias, 14. Loris Bronyo, 57 - Rafael Utziq, 2. Felipe Santos, 77
Hakimlər: Kamal Umudlu, Namiq Hüseynov, Teymur Teymurov, Kamranbəy Rəhimov
VAR: Tural Qurbanov
AVAR: Müslüm Əliyev
Hakim-inspektor: Zöhrab Qədiyev
AFFA nümayəndəsi: Yavər Rəhimov
Zirə İdman Kompleksinin stadionu
18:30. “Neftçi” – “Sumqayıt” - 2:0
Qollar: Solomon Kverkveliya, 54. Mateus Saldanya, 64
Hakimlər: Elçin Məsiyev, Rəhman İmami, Vüsal Məmmədov, Səbuhi Bayramov
VAR: Əliyar Ağayev
AVAR: Rəvan Həmzəzadə
Hakim-inspektor: Feyzulla Feyzullayev
AFFA nümayəndəsi: Əsgər Əmirəliyev
“Bakcell Arena”
Qeyd edək ki, turun ilk matçında “Kəpəz” və “Qarabağ” birincilərin meydanında qollu heç-heçə ediblər – 1:1. Fevralın 6-da “Şamaxı” – “Turan Tovuz” və “Sabah” – “Səbail” görüşləri keçiriləcək.
