Belarusun paytaxtı Minskdə keçirilən II Avropa Oyunlarında azərbaycanlı samboçu Ağasif Səmədov finalda uduzub.
Sportnet.az-ın Oyunlara ezam olunmuş əməkdaşının verdiyi xəbərə görə, Ağasif Səmədov (52 kq) finalda erməni dünya çempionu Tiqran Kirakosyana 0:4 hesabı ilə məğlub olaraq gümüş medalla kifayətlənib.
Bu, Azərbaycanın yeddinci medalı olub. Medalların 3-ü gümüş, 4-ü bürünc əyarlıdır.
--------------
"Minsk 2019" II Avropa Oyunlarında sambo yarışlarının ikinci gününə start verilib.
Sportnet.az-ın Belarus paytaxtına ezam olunmuş əməkdaşının verdiyi məlumata görə, Azərbaycan təmsilçilərindən Ağasif Səmədov (52 kq) 1/4 finala təsadüf edən ilk görüşündə litvalı Gintaras Katkusa qalib gəlib - 5:0. Onun yarımfinaldakı rəqibi belaruslu Maksim Krasinski olub. Səmədov bu görüşünü isə 4:0 hesablı qələbə ilə başa vuraraq, adını finala yazdırıb. Azərbaycan samboçusu həlledici qarşılaşmada Andrey Kubarkova rəqib olub.
Əvəzində Cavidan Qarayev (62 kq) yunanıstanlı Savvas Karakidzisə uduzub. Hesab 1:1 olsa da, rəqib görüşü sonuncu xal prinsipi ilə qalib kimi başa vurub. Qarayev təsəlliverici görüşdə estoniyalı Vadim Fominlə üz-üzə gəlib. Bu dəfə qələbə qazanan Azərbaycan təmsilçisi bürünc medal görüşündə gürcüstanlı Georgi Çirqadzeyə rəqib olub. Lakin Qarayev məğlubiyyətlə üzləşərək, medalsız qalıb.
Abdulla Abdullayev (74 kq) isə xorvatiyalı Dino-Dominik Sumpora yenilib - 3:4. O, təsəlliverici görüşdə ermənistanlı Arsen Qazaryana rəqib olub. Görüş Qazaryanın qələbəsi ilə başa çatıb - 3:0. Beləliklə, Abdullayev "Minsk 2019"da medalsız qalıb.
Qeyd edək ki, ilk yarış günündə Azərbaycanın daha bir samboçusu Mehman Xəlilov (57 kq) erməni Maksim Manukyana 9:1 hesabı ilə qalib gələrək, bürünc medala sahib olub.
