Bolqarıstanın paytaxtı Sofiyada Avropa Voleybol Konfederasiyasının (CEV) XXXVI Baş Assambleyası keçirilib. Sortnet.az-ın məlumatına görə, konfransda Aleksandr Boriçiçç 31 səslə CEV-in yeni prezidenti seçilib.
Eyni zamanda yeni Rəyasət Heyəti və vitse-prezidentlər müəyyənləşib. Yaxın günlərdə komissiyaların sədrləri və üzvləri də müəyyənləşəcək.
Toplantıda ölkəmizi Azərbaycan Voleybol Federasiyasının (AVF) baş katibi Elşən İsmayılov təmsil edib. "Bakı 2015" I Avropa Oyunlarında voleybol növü üzrə yarışları layiqincə təşkil etdiyi üçün AVF-yə minnətdarlıq ifadə olunub.
Eyni zamanda 2017-ci il Azərbaycan və Gürcüstanda təşkil ediləcək Avropa çempionatının təqdimat mərasimi keçirilib. Təqdimat yekdilliklə müsbət qəbul olunub.
