İtaliyada keçirilən voleybolçu qadınlar arasında dünya çempionatında Azərbaycan milli komandası bu gün D qrupunda 3-cü turun oyununa çıxacaq. Sportnet.az-ın məlumatına görə, rəqib Puerto Riko yığması olacaq.
Görüş Bakı vaxtı ilə saat 13:30-da başlanacaq. İlk 2 turdan sonra Puerto Riko Belçika ilə 3 xalla 3-4-cü yerləri bölüşür. Azərbaycan isə 2 xalla 5-ci pillədə qərarlaşıb. Bu baxımdan, mərkəzi amerikalılarla qarşılaşma yığmamız üçün böyük əhəmiyyətə malikdir. Komandamız 3 xallıq qələbəyə imza atacağı halda, növbəti mərhələyə vəsiqə şanslarını qaytaracaq. Növbəti məğlubiyyət isə millimizin ümidlərini puç edə bilər.
2-ci turda komandamız Çinə 0:3 hesabı ilə uduzduğu halda, Puerto Riko Kubanı eyni hesabla yenib. Amma millimizin üstünlüyü ondadır ki, dünən günün birinci yarısında oynayıb, rəqib isə axşam saatlarında meydana çıxıb. Başqa sözlə, təmsilçilərimizin istirahət üçün vaxtı daha çox olub.
25 sentyabr
13:30. Puerto Riko - AZƏRBAYCAN - 2:3 (20:25, 26:24, 24:26, 25:16, 15:17)
20:00. Kuba - Yaponiya - 0:3 (19:25, 24:26, 23:25)
23:00. Belçika - Çin - 0:3 (21:25, 22:25, 19:25)
3 turdan sonra xal durumu: Çin - 9, Yaponiya - 7, AZƏRBAYCAN, Puerto Riko - 4, Belçika - 3, Kuba - 0.
