AÇ-2016: Millimiz yenə eyni hesabla uduzdu - YENİLƏNDİ

Təbii ki, final mərhələsi 2016-cı ildə Fransada keçiriləcək qitə birinciliyinin H qrupunda yer alan Berti Foqtsun komandası üçün ən çətin və arzuolunmaz rəqib məhz apenninlilərdir. Bizə yaxşı tanış italyanların qrupun aşkar favoriti olduğu kimdəsə şübhə doğurmur. Elə buna görə də yarımcan millimizin Palermo şəhərində baş tutacaq oyunda möcüzə etməsinə də inanmaq sadəlövhlük olar. İlk turda evdə Bolqarıstana boyun əyən Foqtsun qrupun açılış görüşündə səfərdə Norveçi asanlıqla məğlub edən (0:2) Antonio Kontenin kollektivi qarşısında sensasiya edəcəyinə yalnız özü inana bilər.

İtaliya millisi ilə əsas yığma səviyyəsində yalnız iki dəfə - Avro-2004-ün seçmə qrup mərhələsində qarşılaşmışıq. Klub və aşağı yaş qrupları səviyyəsində də bir neçə dəfə üz-üzə gəldiyimiz siciliyalılar qarşısında, hələ ki, uğurlu nəticəmiz "Neftçi”nin Avroliqanın qrupu çərçivəsində Milanda "İnter”lə 2:2 hesablı bərabərə (!) qalmasıdır. Əsas millilər indiyə qədər iki dəfə görüşüblər ki, hər iki matçda sevinən tərəf rəqib olub. "Göylər” 2002-ci il sentyabrın 7-də "Tofiq Bəhramov”da keçirilən ilk oyunda iki cavabsız qolla qalib gəliblər – 0:2. 2003-cü il oktyabrın 10-da oynanılan cavab dueli daha faciəvi hesabla yekunlaşıb - Reco di Kalabriyada milli komandamıza güzəştə getməyiblər – 4:0.

 

Hazırda AZAL-da baş məşqçi olan millimizin sabiq müdafiəçisi Tərlan Əhmədovun İtaliya ilə Bakıdakı oyunda avtoqolla "tarix”ə düşdüyünü qeyd edək. Görüşdə digər qolu isə cərimə zərbəsindən, əlbəttə ki, əfsanəvi qoleador Alessandro del Pyero vurmuşdu. İtaliyadakı qarşılaşmada isə "Superpippo” - Filippo İnzagi dubl etmiş, hərəyə bir dəfə digər veteranlar - Kristian Vyeri ilə Marko di Vayo fərqlənmişdi. 

Geridə qalan 12 ilə nəzər salsaq, hazırda həmin heyətdən iki futbolçu qalır – qapıçı Canluici Buffon və yarımmüdafiəçi Andrea Pirlo. Pirlo DÇ-2014 başa çatandan sonra milli karyerasını yekunlaşdırmaq qərarı versə də, "Yuventus”da rəhbərliyi altında oynadığı Antonio Kontenin sözünü yerə salmayaraq, yenidən "Skuadra Adzurra”ya qayıdıb. Millimizin heyətindən isə yeganə futbolçu Rəşad Sadıqovdur ki, Foqts zədəli olan kapitanı düşərgəyə son anda qaytarıb. Sadıqovun Palermoda oynanılacaq bugünkü matçda növbəti dəfə italyanlara qarşı meydana çıxıb-çıxmayacağına almaniyalı mütəxəssis qərar verəcək. 2002-cil ildəki heyətdən digər bir şəxs – Mahmud Qurbanov isə italyanlara qarşı millinin məşqçilər heyətində yer alacaq.

 

Qol: Corco Kyellini, 44; 82 - Corco Kyellini, 76 - öz qapısına

İtaliya: 1. Buffon (kap.), 2. De Şilyo, 3. Kyellini, 13. Ranokkia, 19. Bonuççi, 20. Darmian, 8. Markizio, 15. Florentsi, 21. Pirlo, 7. Zaza, 9. İmmobile

Palermo. "Rentso Barbera" stadionu

Baş hakim: Hüseyin Göçek

Yan xətt hakimləri: Mustafa Eyisoy, Orkun Aktaş

Dördüncü hakim: Serkan Ok

Əlavə köməkçi hakimlər: Mete Kalkavan, Hakan Ceylan (hamısı Türkiyə)
Hakim inspektor: Alan Freland (Şotlandiya)
UEFA nümayəndəsi: Tis Rolan (Belçika)

Palermodakı "Rentso Barbera" stadionundan mətn yayımına başlayırıq. İtaliya - Azərbaycan matçından öncə komandalar birgə irqçiliyə qarşı olduqlarını nümayiş etdirirlər. 

Oyun başladı. 
5` Bədavi Hüseynovun müdafiədəki kobud səhvindən sonra Markizio topa yiyələnərək, hesabı açmağa yaxın oldu. 
9` İmmobile çoxgedişli kombinasiyadan sonra topu qapının yanından vurdu. 

İlk 10 dəqiqə ərzində oyun meydanın millimizə aid hissəsində, daha dəqiqi, cərimə meydançası həndəvərində keçir. 

12` Dadaşov Kyelliniyə qarşı kobudluğa görə sarı vərəqə alır.

13` Kamran Ağayev Bonuççinin zərbəsindən sonra komandamızı qoldan xilas etdi. 

18` İlkin Qırtımov De Şilyo ilə mübarizədə yerdə qalır. Xoşbəxtlikdən, zədəsi ciddi olmur və o, oyuna davam edə bilir. 
26` Qarayevin kobud səhvindən sonra italiyalı futbolçuların hücumu künc zərbəsi ilə nəticələndi. Kornerdən sonra isə Bonuççinin təhlükəli zərbəsini Kamran Ağayev qaytara bildi. 
31` Qapı qarşısına ötürmədən sonra Bonuççinin zərbəsi Hüseynova dəyir. İtaliyalılar Bədavinin əllə oynadığını iddia edir. 

33` Millimizin əks-hücumu zamanı Pirlo Rauf Əliyevə qarşı kobud oynayır. Referi ona sarı vərəqə göstərir. Nazarov isə veteran futbolçuya etirazını bildirir. Meydanda kiçik toqquşma yaranır. 

36` Allahverdiyevin kobud oyunundan sonra Pirlonun yerinə yetirdiyi cərimə zərbəsi və Ranokkidən təhlükəli vuruş. Top qapının üstündən keçir. 

40` Dadaşovun uzaq məsafədən zərbəsi qapının üstündən keçir. 

44`  Künc zərbəsindən sonra Ağayevin irəli çıxmasından yararlanan Kyellini hesabı açdı. 

İlk yarı başa çatdı. 

İkinci hissə başladı
46` Millimizdə əvəzləmə. Qırtımovu Ramaldanov əvəzləyir. 
47` Zaza topu başı üzərindən tora göndərmək istəyir. Top qapıdan azacıq aralı keçir. 
48` Millimiz daha bir təhlükə yaşadı. Zaza topa tullanaraq, zərbə endirmək istərkən, təhlükəli oynadı. Referi oyunu saxladı. 
59` Millimizdə növbəti əvəzləmə. Dadaşovun əvəzinə Cavid Hüseynov oyuna girdi. 

62` Millimizin qapısı qarşısında növbəti təhlükəni Qarayev sovuşdurur. 

66` Nazarov mərkəzdə topu ələ keçirərək, bir qədər irəlilədikdən sonra zərbə endirir. Buffon o qədər də qüvvətli olmayan topu tutur. 

68` Zaza qapı qarşısına ötürmədən sonra təhlükəli zərbə endirir. Top qapıdan azacıq aralı keçir. 
73`İtaliya yığmasında rekord sayda - 113-cü oyununu keçirən Pirlo meydanı tərk edir. Onun yerinə Akvilani meydana girir. 

QOOOOL!!!!!!!!!75` Millimiz ilk künc zərbəsi qazanır. Künc zərbəsindən sonra Rauf Əliyevin zərbəsinin qarşısını almaq istərkən, Kyellini topu öz qapısına göndərir. 

Florentsinin əvəzinə Covinko meydana girir.  

Darmianın əvəzinə Kandreva meydana girir. 

Yenə künc zərbəsi, yenə Kyellini. Covinkonun ötürməsindən sonra o, İtaliyanı yenidən hesabda önə çıxardı. 

Rəşad Sadıqov İmmobilenin hücumunun qarşısını kobudluqla alır və cəzalanır. 

85` İtaliya növbəti dəfə toru silkələyir. Amma referi Zazanın Ağayevə qarşı kobud oynadığını bildirərək, qolu hesaba almır.

86` Millimizdə növbəti əvəzləmə. Əmirquliyevi Nadirov əvəzləyir. 
87` Zazaya kobud oyuna görə sarı vərəqə göstərildi. 
 
90` Oyuna 3 dəqiqə artırıldı. 

90+1` Covinkonun zərbəsi qapı tirinə tuş gəldi. 

Oyun başa çatdı.