Azərbaycan milli komandasının baş məşqçisi Mahmud Qurbanovun Sportnet.az-a müsahibəsi...
- Cavid İmamverdiyevin "Elazığspor"un heyətindəki çıxışı sizdə necə təəssürat yaratdı?
- Ötən gün "Elazığspor"un "Samsunspor"la səfər qarşılaşmasını canlı izlədim. İmamverdiyev start heyətdə meydana çıxmışdı və bir hissə oynadı. Çoxdandır onun çıxışını görməmişdim. Məhz bu səbəbdən getmişdim ki, Türkiyədə izləyim. Bu dəfə canlı şahidi oldum. Pis təsir bağışlamadı. Oyundan sonra da özü ilə görüşdüm.
- Amma Türkiyə I Liqasında çıxış edən futbolçularımızdan Mahir Şükürov daha inamlı təsir bağışladı. O, hətta ilk qolunu da vurdu...
- Bəli, Şükürov "Manisaspor"la matçda cərimə zərbəsindən fərqləndi. Bu qolun videosuna baxdım. Əslində Mahirin oyununa bələdik. Vurduğu qol da nəyə qadir olduğunu göstərir. Sadəcə, ola bilsin, Bolqarıstanla qarşılaşmadakı oyunu Berti Foqtsu qane etmədiyindən, İtaliya və Xorvatiya ilə görüşlərə onu çağırmamışdı. Amma yenə də o, aparıcı futbolçularımızdan biri olaraq qalır.
- Bəs Vaqif Cavadovun hətta uğursuz günlərini yaşayan "Qaziantep BB"də əsas heyət üzvünə çevrilə bilməməsi barədə nə deyə bilərsiniz?
- Onun da oyununu izləməsəm də, 15-ci dəqiqədə meydana girməsindən xəbərdaram. Düzdür, komandası uğurlu çıxış etmir, amma Vaqifin də nəyə qadir olduğunu bilirik.
- Millimizin noyabrın 16-da Norveçlə keçirəcəyi AVRO-2016-nın seçmə qrup matçı üçün heyəti nə zaman açıqlayacaqsınız?
- Yəqin ki, noyabrın 2-dək açıqlayacağıq. Əvvəlcə geniş siyahı olacaq. Təlim-məşq toplanışının ardından futbolçuların sayı azaldılacaq.
- Heyətdə yeni adlara rast gələcəyik?
- Əvvəllər də demişəm: yığmanın qapıları hamının üzünə açıqdır. Kim özünü yaxşı tərəfdən göstərəcəksə, o da dəvət alacaq.
- "Qarabağ"ın heyətində çıxış edən milli üzvləri ağır Avroliqa qarşılaşmalarından sonra nə dərəcədə faydalı ola bilərlər?
- Bu komandanın uğurlu çıxışı millimiz üçün də lazımdır. Çünki "Qarabağ"da çıxış edən futbolçuların beynəlxalq təcrübəsi bizə gərəkli ola bilər. Təbii ki, onlara da dəvət göndərəcəyik.
- Bəs Premyer Liqanın bombardirlər siyahısının ön cərgələrində olan Rəşad Eyyubovla Nurlan Novruzovun ilk dəfə milliyə dəvət alma perspektivlərini necə görürsünüz?
- Hər bir oyunçu barədə ayrılıqda danışmaq düzgün çıxmazdı. Yenə deyirəm: hələ irəlidə kifayət qədər vaxt var. Kim özünü yaxşı tərəfdən göstərəcəksə, o da milliyə çağırılacaq. Amma təbii ki, bombardirlər siyahısında yerli futbolçuları görmək xoşdur.
