Yaponiyalı kanoeçi Yasuxiro Suzuki yığmaya düşmək uğrunda mübarizə apardığı rəqibinin içkisinə istifadəsi qadağan olunmuş maddə tökdüyü üçün 8 il müddətinə yarışlardan kənarlaşdırılıb.
Sportnet.az xəbər verir ki, bununla bağlı qərarı Yaponiya Anti-Dopinq Agentliyi qəbul edib.
Yaponiya Kanoe Federasiyasının məlumatına görə, İsikava şəhərində keçirilmiş ölkə çempionatında 32 yaşlı Suzuki özündən 7 yaş kiçik rəqibi Seydzi Komatsunun içkisinə qadağan olunmuş maddələr siyahısına daxil olan anabolik steroid - metandienon səpib. Bundan sonra Komatsu çempionatdan kənarlaşdırılsa da, qərara etiraz edib. Bu səbəbdən, Yaponiya Anti-Dopinq Agentliyi təhqiqat aparıb və onun günahsız olduğu üzə çıxıb.
Hər iki idmançı 2020-ci il Tokio Yay Olimpiya Oyunlarında iştirak etmək üçün yığmaya namizəddirlər.
Qeyd olunur ki, Yasuxiro Suzuki daha öncə də qeyri-idman davranışı ilə fərqlənib. O, yarış və məşqlər zamanı rəqiblərinin inventarlarını oğurlayıb.
