Elşən MƏMMƏDOV
"Qızıl top" mükafatının sahibi bilirsinizmi kimlərin səsverməsi əsasında müəyyənləşdi?
FIFA reytinqində ilk "100-lük"də olan ölkələrin aparıcı media nümayəndələri arasında səsvermə nəticəsində.
Yəni, Azərbaycan mediası bu səsvermədə təmsil olunmadı. Bunu AFFA da, millinin kapitanı Bədavi Hüseynov da təsdiqlədi.
Bu, FIFA-nın təsis etdiyi "The Best" mükafatı deyil ki, orada bütün milli komandaların baş məşqçiləri, kapitanları və idman mediası təmsil olunsun.
Niyə Azərbaycan idman mediası "France Football" nəşrinin səsverməsində təmsil olunmadı? Çünki Azərbaycan millisi hazırda ilk "100-lük"də deyil.
İndi "100-lük"dəki ölkələrin mediası ilə öz öz mediamızı müqayisə edək? Doğrudanmı biz, buraxın ümumi medianı, hətta dünyanın 100 ən yaxşı idman mediası sırasında yoxuq?
Çox uzaq tarixdə yox, sentyabrın 18-də açıqlanmış FIFA-nın son reytinq siyahısına baxaq...
Azərbaycan daha 2 pillə geriləyərək, 124-cü pilləyə enib. Bilirsinizmi "100-lük"dəki son 5 ölkə hansılardır?
- Lüksemburq, Mozambik, Qvatemala, Fələstin, Belarus.
Azərbaycan idman mediası bu ölkələrin hansından geridədir?
Niyə Azərbaycan mediası Azərbaycan millisinin səviyyəsi ilə ölçülməlidir? Yəqin "Qızıl top" mükafatının təşkilatçısı "France Football" nəşri elə düşünür ki, Fransa yığması və PSJ dünya çempionu ola bilirsə, deməli, özləri də nömrə 1-dir.
O məntiqlə hansı ölkənin futbolu güclüdürsə, deməli, o ölkənin idman mediası da həmin səviyyədədir.
Həqiqətənmi hər hansı ölkənin milli komandası nə vəziyyətdədirsə, idman mediası da o səviyyədədir?
Bunların məntiqinə bax! Belə çıxır ki, milli komandanı bu günə salanlar təzminat alıb qovulacaq, son "heç-heçəyə15 dənə alacaq", o pulu verənlər özləri üçün kef çəkəcək, baş katibi media görəndə suallardan qaçacaq, amma günahkar idman mediası çıxacaq?
Bu məsələyə necə fransız qalmaq olar?
