Rusiyanın Penza vilayətini təmsil edən "Zenit" klubunun baş məşqçisi Sergey Filippenkov oyun zamanı ölüb. Sportnet.az-ın məlumatına görə, bədbəxt hadisə "Zenit"in veteranları ilə "Penzqorstroyzakazçik" tikinti şirkətinin əməkdaşları arasında keçirilən matçda baş verib.
Matç zamanı 45 yaşlı mütəxəssisin qəflətən halı pisləşib və o yerə yıxılıb. Əraziyə təcili tibbi yardım çağırılsa da, həkimlər sabiq futbolçunun həyatını xilas edə bilməyib.
Hadisə baş verən zaman oyunun bitməsinə 5 dəqiqə qalıb və həmin dəqiqəyə qədər Filippenkovun komandası 3:0 hesabı ilə öndə olub. Qollardan birini isə mərhumun özü vurub.
Qeyd edək ki, Sergey Filippenkov futbolçu karyerası ərzində ÇSKA-nın heyətində Rusiya çempionatının gümüş və bürünc medallarını qazanıb. O, "Çernomorets", "Metallurq", "Dnepr" kimi komandaların şərəfini qoruyub. Milli komandaya da dəvət alan sabiq yarımmüdafiəçi 2010-cu ildə futbolçu karyerasını başa vurub.
