AFFA-nın prezidenti Rövnəq Abdullayev İsveçrənin Sürix şəhərində UEFA-nın növbədənkənar Konqresində və FİFA prezidenti seçkisində iştirak edəcək. Sportnet.az-ın məlumatına görə, bu barədə "Report"a açıqlamasında milli assosiasiyanın baş katibi Elxan Məmmədov bildirib.
E.Məmmədov bu gün keçiriləcək Konqresə R.Abdullayevlə birgə qatılacağını bildirib. İclasın gündəliyinə 3 məsələ daxil edilib: Ötən və qarşıdakı hesabat ilinin müzakirəsi, təşkilatın büdcəsi və Nizamnaməsində dəyişikliklərin edilməsidir. UEFA prezidenti Mişel Platininin üzləşdiyi situasiyanın da diqqətdən kənarda qalmayacağı gözlənilir.
FİFA prezidenti seçkisi isə fevralın 26-da baş tutacaq. Baş katib sabahkı tədbirdə AFFA-nın vitse-prezidenti Elşad Nəsirovun da iştirakının gözlənildiyini bildirib.
