Azərbaycan Premyer Liqasında növbəti mövsümün püşkatma mərasiminin vaxtı hələ dəqiqləşməyib. Bu haqda Sportnet.az-a məlumat verən Peşəkar Futbol Liqasının (PFL) prezidenti Ramin Musayev tədbirin bu ayın ikinci yarısında olacağını bildirib.
Musayev AFFA-nın inzibati binasında keçirilməsi nəzərdə tutulan tədbirdən öncə millimizin baş məşqçisi Robert Prosineçki ilə görüşünün olacağını söyləyib: "Püşkdən öncə Prosineçki ilə görüşməliyik. Bu, növbəti çempionatın təqvimi ilə bağlıdır. Prosineçkinin proqramına əsasən təqvimimizi qurmalıyıq".
Məlum olduğu kimi, millimizin xorvatiyalı çalışdırıcısı AVRO-2016-nın keçirildiyi Fransada millimizin növbəti seçmə mərhələdə rəqiblərini izləyir. Bunlardan Çexiya ilə Şimali İrlandiya yığmaları mübarizəni dayandırsalar da, Almaniya millisi yarımfinala vəsiqə qazanıb. Final mərhələsi iyulun 10-da yekunlaşacaq və göründüyü kimi, PFL rəhbərliyi Prosneçkinin Bakıya qayıtmasını gözləyir. Buna əsasən püşkün günü də dəqiqləşəcək.
Xatırladaq ki, 2016/17 mövsümündə Premyer Liqada ilk dəfə olaraq 8 komanda çıxış edəcək. Çempionatın startının isə avqustun ilk həftəsinin sonunda - 6-7-də olması planlaşdırılıb.
