"Qarabağ"ın keçmiş futbolçusu Samuel Armenterosun İngiltərənin "Bristol Siti" klubuna keçidi baş tutmayıb. Sportnet.az-ın məlumatına görə, 26 yaşlı hücumçu Çempionşip komandasında iki həftəlik sınaq dövründən üzüağ çıxa bilməyib.
O, "Yovil Taun"u 2:1 hesabı ilə yendikləri matçda yoxlanılsa da, baş məşqçi Li Consonda özü barədə xoş təəssürat oyada bilməyib. Nəticədə Armenteros İspaniya toplanışına aparılmayıb. Əvəzində "Çelsi"nin yetirməsi Temmi Avraama şans verilməsi qərara alınıb.
Qeyd edək ki, Samuel Armenteros "Qarabağ"da 2015-2016 mövsümündə forma geyinib. O, 23 oyuna 7 qol vurub.
