Azərbaycan milli komandasının yeni debütantı Deniz Yılmaz 2018-ci il dünya çempionatının seçmə mərhələsində sentyabrın 4-də San-Marino yığması ilə səfərdəki rəsmi oyunda iştirak etməyəcək. Sportnet.az-ın məlumatına görə, buna səbəb FİFA-nın millimizdə çıxış etməsi ilə bağlı rəsmi icazə verdiyi Türkiyə "Bursaspor"unun hücumçusunun zədəli olmasıdır.
Yılmaz hazırda "Fənərbağça" ilə oyuna hazırlaşan klubunun düşərgəsində olsa da, fərdi məşq edir. O, yaşıl meydana qayıtmaq üçün günlər sayır: "Ötən mövsümkü formamı yığacağıma inanıram. Hər matçda özümü yaxşı tərəfdən göstərmək və daha uğurlu işlər görmək istəyirəm. Özümü yüz faiz hazır hiss edəcəyim halda, komanda yoldaşlarımın köməyi ilə daha çox qol vuraram və buna yardımçı olaram".
Xatırladaq ki, Deniz Yılmaz sentyabrın 2-dən hüquqi baxımdan millimizin futbolçusu sayılır.
