İngiltərə "Mançester Yunayted"inin baş məşqçisi Joze Mourinyo ilk mankunian derbisindən məğlub ayrılıb.
Sportnet.az-ın məlumatına görə, "qırmızı şeytanlar" öz meydanında Xosep Qvardiolanın rəhbərlik etdiyi "Mançester Siti"yə uduzub.
Bütün qollar ilk yarıda vurulub. Qalib komandadan 15-ci dəqiqədə Kevin de Breyne, 36-cı dəqiqədə isə Keleçi İxeanaço fərqlənib. Meydan sahiblərinin yeganə qolunun müəllifi isə 42-ci dəqiqədə Zlatan İbrahimoviç olub.
Bu, "şəhərlilər"in cari mövsümdə ardıcıl 4-cü qələbəsi olub. "Mançester Yunayted" isə ilk dəfə xallar itirib. Hazırda "Mançester Siti" 12 xalla liderdir.
Qeyd edək ki, Joze Mourinyo "qırmızı şeytanlar"a mayın 27-də baş məşqçi təyin olunub. Onunla sonradan daha bir mövsüm uzadıla bilməsi şərtilə 3 illik müqavilə bağlanılıb. Xosep Qvardiolanın təyinatı isə fevralın əvvəllərində açıqlanıb.
