"Neftçi"nin yeni transferi Jonas Enrike Pessalli Azərbaycan Premyer Liqasında debüt etdiyi "Zirə" ilə matçdan sonra brifinq keçirib. Sportnet.az saytının qarşılaşmada olan əməkdaşının da suallarını cavablandıran baziliyalı yarımmüdafiəçi ilk olaraq 0:2 hesabı ilə uduzduqları oyunu dəyərləndirib.
- Biz oyuna yaxşı hazırlaşmışdıq. Bilirdik ki, bu matç çətin olacaq. "Zirə" də asan rəqib deyildi. Hər şey bir göz qırpımında baş verdi. Futbolçumuz qırmızı vərəqə aldı, bundan öncə qapımızda penaltidən qol gördük. Bunlar hamısı birdən, gözlənilmədən oldu. Çox təəssüf ki, məğlub olduq.
- "Neftçi"nin hazırkı vəziyyətini necə dəyərləndirərdin? Həm də debütün uğurlu alınmadı...
- Bura gəlməmişdən qabaq "Neftçi" ilə maraqlandım. Bilirdim ki, böyük klub olub, "Neftçi"nin böyük tarixi olduğu haqda məlumatlıyam. Məsuliyyəti dərk edirəm. Mən də "Neftçi"yə köməyimin dəyməsi üçün gəlmişəm. Əlimdən gələni edim ki, əvvəlki vaxtlarına qayıtsın.
- Bəs komandanın bugünkü mövqeyi ilə maraqlanmısan?
- Bəli, indi hansı vəziyyətdə olduğunu bilirəm. Hara gəldiyim haqda məlumatım vardı. Klub rəhbərliyi, məşqçilər korpusu yenidir. Hamı çalışır ki, "Neftçi"ni bu vəziyyətdən çıxaraq və yenidən ilk üçlüyə qaytaraq.
- "Neftçi" ilə 2,5 aylıq müqavilə bağlamısan. Bu, karyeranda ilk dəfə olub? Niyə belə qısamüddətli anlaşmaya razı oldun?
- Karyerama nəzərə salsaq, 5 il Braziliyada oynamışam. Legioner həyatı yaşamışam, Fransada oynamışam. İlk dəfə həyatımda belə bir şey baş verir ki, 2,5 aylıq müqavilə imzalayıram. Bu da mənim üçün yeni təcrübə, yeni ölkədir. Çalışacağam ki, özümü yaxşı tərəfdən göstərərək burda daha çox qalım.
- Nəyə görə bu müddətə razı oldun: Çarəsiz idin, yoxsa variantın yox idi?
- "Neftçi"də hər şey yenidən qurulmaq üzrədr. Ona görə razı oldum ki, uyğunlaşıb-uyğunlaşmayacağımı bilmirəm. Bu üzdən, vəziyyətə baxacağıq. Hər şey yaxşı olsa, burda qalmaq istərəm. Yaxşı olmasa, əlbəttə, getməli olacağam.
- Yayda komanda tapa bilməməyinin səbəbi nə idi?
- Son 5 ili Fransada keçirəndən sonra başqa bir ölkəyə getmək, konktret, Asiyada oynamaq istəyirdim. Sonda axtardıqlarım arasında "Neftçi" variantı çıxdı.
