"Qəbələ” klubunun baş məşqçisi Roman Qriqorçuk Azərbaycan Kubokunun ilk yarımfinal səfər matçında "İnter” üzərində 2:1 hesablı qələbədən sonra fikirlərini bölüşüb. Sportnet.az-ın məlumatına görə, 52 yaşlı ukraynalı mütəxəssis oyundan sonra təşkil edilən mətbuat konfransında jurnalistlərin suallarını da cavablandırıb.
- Komandanız son oyunlarda xeyli sayda qol vəziyyəti yaratsa da, reallaşdırmaqda çətinlik çəkir. Bu nə ilə bağlıdır?
- Səbəblər bir neçədir. Bir sözlə ifadə etsək, ustalıq səviyyəsi çatmır. Uşaqlara yazığım gəlir, qol vəziyyətləri çox olsa da, istifadə edə bilmirlər. Bunun üzərində işləməliyik. Qol vurmaq üçün intellekt yüksək olmalıdır.
- Buardan çıxandan sonra otelə gedəcəksiniz, yoxsa "Bakcell Arena"ya?
- Xeyr, stadiona getməyəcəm. Öz oyunlarımızı düşünürük. İstirahət etmək lazımdır.
- Daniel Subotiç əvəzlənərkən məyus görünürdü. Zədəsi vardı?
- Xeyr, buna zədə deməzdim. Onu başa düşürəm, 2 qol vurdu. Yenə də fərqlənə bilərdi. Ona görə də, məyusluğunu anlayıram.
