"Neftçi”nin sabiq futbolçusu Marko Dafçev Sportnet.az-a müsahibə verib. 2008/2009 mövsümündə ölkəmizdə top qovmuş Dafçev həmin dönəmdə Azərbaycan çempionatının ən bahalı oyunçularından hesab edilirdi.
- Marko, hazırda hansı işlə məşğulsan?
- Futbol aləmindəyəm. Bolqarıstanın U-15 yığma komandasına başçılıq edirəm.
- "Neftçi” ilə indi heç maraqlanırsan?
- Bəli. Bilirəm ki, hazırda "Neftçi” çətin durumdadır. Qışdan sonra komandaya yeni oyunçular dəvət edilib. Onların komandaya öyrəşməsi və özlərini ən yaxşı tərəfdən göstərməsi üçün vaxt lazımdır.
- Qışdan sonra komandanın hansı oyununu izləmisən?
- Düzü, oyunu izləmişəm. Yalnız nəticələrlə tanış oluram və heyətə baxıram. Çünki hazırda "Neftçi”nin oyunlarını izləmək imkanım yoxdur.
- Ölkə kubokunun yarımfinal mərhələsində "Neftçi” "Qarabağ” səddinə ilişdi...
- Şans hər zaman olur. Ancaq o vaxt da "Qarabağ”ı keçmək çətin idi. Çünki "Qarabağ” kimi komandalar səhv etmir. Ona görə belə alınıb.
- "Neftçi”nin heyətində keçirdiyin ən unudulmaz oyun hansıdır?
- İntertoto kubokunda "Jerminal”la qarşılaşmışdıq. Bakıda 1:0 qalib gəldiyimiz matç mənim üçün unudulmazdır. Həmin matçda qolumuzu Elnur Allahverdiyev vurmuşdu. Fikrimcə, həmin oyunu çox yaxşı oynamışdıq. Baş məşqçimiz də Anatoli Demyanenko idi.
- Azərbaycana gəldiyin vaxt ölkə futbolunun ən bahalı transferi kimi tanınırdın. Həqiqətənmi belə idi?
- Mənə görə nə qədər pul ödənildiyini bilmirəm. "Neftçi” və "Lokomotiv” (Plovdiv) danışıb razılaşmışdılar.
- Səncə, niyə "Neftçi”də işlərin yaxşı getmədi və özünü doğrulda bilmədin?
- Məncə də, "Neftçi”də hər şey istədiyim kimi alınmadı. Amma nəzərə alaq ki, həmin vaxt "Neftçi”də bir ildə üç baş məşqçi dəyişikliyi oldu. Bu da hardasa, öz təsirini göstərir.
- İndinin özündə də belədir "Neftçi”də. Bir mövsümdə bir neçə dəfə baş məşqçi dəyişikliyi olur..
- Bunu "Neftçi” rəhbərliyindən soruşun, bir söz deyə bilməyəcəyəm.
- Əvvəlki illərdən fərqli olaraq hazırda Azərbaycan klubları bolqarıstanlı oyunçulara ehtiyac duymur. Səncə, bu, nədən irəli gəlir?
- Bolqarıstanlı oyunçular özlərini hər zaman yaxşı tərəfdən göstərib. Ancaq indi Azərbaycanda bolqar oyunçuların olmamasının səbəbini bilmirəm.
- Bolqarıstanın U-15 yığma komandasının baş məşqçisisən. Azərbaycanlı həmyaşıdlarınızla yoxlama oyunu keçirməyi planlaşdırırsız?
- Çox güman ki, bu il olmayacaq. Ola bilsin ki, gələn il keçirdik.
