"Sumqayıt"ın futbolçusu Amil Yunanov Azərbaycan kubokunun 1/4 final mərhələsinin cavab oyununda "Qarabağ"ı 2:0 hesabı ilə məğlub etdikləri oyundan sonra jurnalistlərin suallarını cavablandırıb.
Sportnet.az həmin müsahibəni təqdim edir.
- Bu gün "Sumqayıt” üçün tarixi bir gündür. Bu uğur nəyin hesabına qazanıldı?
- Əlbəttə bu tarixi qələbədir. Səfərdən yaxşı nəticə ilə qayıtdıq. Orda qol vurmaq sərfəli nəticə idi. Biz fikirləşirdik ki, 1:0 hesablı qələbə də bizi qane edir. Qələbə qazandığımıza görə çox sevinirik. Azarkeşlərin də dəstəyi çox oldu. Komandada hamı mübarizə apardı. "Sumqayıt” kubokda dəfələrlə "Qarabağ”a rəqib olub. Amma bu komandanı məğlub edə bilmirdik. Qarşımıza məqsəd qoyduq və növbəti mərhələyə adladıq. Növbəti mərhələdə "Keşlə”ni də keçib final oynamaq istəyirik.
- Qolu çılğınlıqla qeyd etdin. Qol vura bilmirdin? Yoxsa baxımlı alındı?
- Topu boş qapıya da vursam qolu belə qeyd edərdim. Qol vurmaqda çətinlik çəkirdim. Qara zolağa düşmüşdüm. Qol vurduğuma görə sevinirdim. Rəqib "Qarabağ” olduğuna görə, çox sevindim.
- Formanı da çıxartdın...
- Bəlkə də düz deyildi. Özümü saxlaya bilmədim.
- O sarı vərəqə sənə çətinlik yarada bilər.
- Bilirəm. Amma çalışacam ki, sarı kart almayım.
- "Qarabağ”ı keçəndən sonra "Sumqayıt”ın finala yolu açıldımı?
- "Keşlə” də yaxşı komandadır. Əsas rəqiblərimizdən biri "Qarabağ” idi. Bu səddi keçdik. Növbəti mərhələni keçib final oynamaq bizim üçün çox vacibdir.
- Samir Abasov ölkədən kənardadır. Heyəti özü müəyyənləşdirdi yoxsa Seymur müəllim?
- Səfərdə də bu heyətlə oynadıq. Pis oynamadıq. Mənim o bərədə məlumatım yoxdur. Onu məşqçilər bilir.
- Oyundan sonra klub prezidenti ilə söhbətiniz oldu. Bu nə ilə bağlı idi?
- Bizi təbrik elədi. Sevincini bizimlə bölüşdü.
- Bu oyunda həm də milli komandanın baş məşqçisi səni izlədi. Milliyə düşmək barədə nə deyə bilərsən?
- Milli komandanın formasını geyinmək ən böyük arzularımdan biridir. O formanı geyinmək üçün çox çalışmaq lazımdır. Böyük arenalarda oynamağın vaxtıdır. Mən də istəyərəm ki, millidə çıxış edim. Çağırsalar canla-başla oynamağa hazıram.
- Sənin fikrinvə milli komandadan yolun "Qarabağ”dan keçir, yoxsa "Sumqayıt”dan dəvət ala bilərsən?
- Komandamız 4-cü yerdədir. Kubokda da mərhələ adladıq. Milli komandaya getmək üçün "Sumqayıt” ən yaxşı variantdır.
