Almaniyanın II Bundesliqasında çıxış edən "Kayzerslautern” futbol komandasının baş məşqçisi Ceff Ştrasser oyun zamanı infarkt keçirib.
Sportnet.az "Bild”ə istinadən xəbər verir ki, hadisə yanvarın 24-də XIX tur çərçivəsində "Darmştadt”la səfər matçının fasiləsində baş verib. Ürəyində problem yaranan 43 yaşlı lüksemburqlu mütəxəssis dərhal xəstəxanaya çatdırılıb. İlk hissədən sonra hesabın açılmadığı qarşılaşma isə təxirə salınıb.
Hazırda Ştrasserin səhhətinin normal olduğu bildirlir.
Qeyd edək ki, hesabında 12 xal olan "Kayzerslautern” sonuncu – 18-ci pillədə qərarlaşıb.
