Azərbaycan milli komandası Belarus yığması ilə tarixində üçüncü dəfə yoldaşlıq görüşündə üz-üzə gələcək. Sportnet.az-ın məlumatına görə, ilk qarşılaşma 1996-cı il mayın 27-də Belarusun Molodeçno şəhərində təşkil olunub.
2:2 hesablı heç-heçə ilə yekunlaşmış qarşılaşmada Azərbaycan yığmasının qollarını Ruslan İdiqovla hazırda millinin baş məşqçisi olan Qurban Qurbanov vurub.
2001-ci il fevralın 26-da Bolqarıstanın Albena şəhərindəki təlim-məşq toplanışına təsadüf edən matçda isə millimiz qalib gəlib - 1:0.
İki komanda arasındakı üçüncü qarşılaşma martın 23-də Bakı Olimpiya Stadionunda təşkil olunacaq.
Qeyd edək ki, İqor Kriuşenkonun baş məşqçi olduğu komanda Bakıdan sonra Lyublyanaya səfər edərək, martın 27-də Sloveniya ilə də yoldaşlıq oyununa çıxacaq. Azərbaycan millisi isə həmin gün Türkiyənin Antalya bölgəsində Makedoniya ilə üz-üzə gələcək. İyunun 9-da isə Qurban Qurbanov futbolçu olduğu vaxt qol vurduğu Latviya yığması ilə səfərdə baş məşqçi qismində üz-üzə gələcək.
