Dünya futbolu daha bir ulduz siması ilə vidalaşmaq ərəfəsindədir. Sportnet.az-ın məlumatına görə, karyerasını başa vurmağa hazırlaşan növbəti futbolçu Tyerri Anridir.
Fransa milli komandasının sabiq hücumçusu hazırda karyerasını davam etdirdiyi "Nyu York Red Bullz" komandası ilə müqavilə müddətini uzatmaqdan imtina edib. Buna səbəb veteran forvardın mövsümün sonunda böyük futboldan getməyə qərar verməsidir.
Qeyd edək ki, 37 yaşlı təcrübəli futbolçu 2010-cu ilin yayından Amerikada çıxış edir. ABŞ-a "Barselona"dan yollanan Anri "Nyu York Red Bullz"da keçirdiyi 125 oyunda 50 qol vurub, 37 məhsuldar ötürmə ilə yadda qalıb.
