Azərbaycan milli komandasının futbolçusu Araz Abdullayevin Yunanıstanın "Panionios" klubuna transferinin baş tutmamasının səbəbi müəyyənləşib.
Sportnet.az-ın məlumatına görə, bu barədə "Protathlima" nəşri klubdakı mənbəyə istinadən xəbər yayıb. Mənbə bildirib ki, Abdullayev "Panionios"la müqavilə bağlasa da, müvafiq sənəd Yunanıstan Futbol Federasiyasına təqdim olunmamış Azərbaycana qayıdıb. Klubdan bunu 26 yaşlı yarımmüdafiəçinin anasının səhhətində yaranmış problemlə əlaqələndiriblər.
Hələlik futbolçunun "Panionios"a qayıdıb-qayıtmayacağı bilinmir. Lakin bu transferin baş tutmayacağı güman olunur. Ehtimalları Abdullayevin "Panionios" düşərgəsində çəkdirdiyi fotonu sosial şəbəkədəki hesabından silməsi də təsdiqləyir.
"Qəbələ"dən Sportnet.az-a verilən məlumata görə, futbolçu artıq "Panionios"a satılıb. Bu səbəbdən, Abdullayevin Bakıya qayıtması "qırmızı-qaralar"a dönəcəyi anlamına gəlməməlidir. Futbolçu artıq Yunanıstan klubunun sərəncamındadır.
