Türkiyənin "Bursaspor" klubunun prezidenti Ali Ay Con Delarjın "Qarabağ"a keçidini təsdiqləyib.
Sportnet.az "Habertürk”ə istinadən xəbər verir ki, Bursa təmsilçisini rəhbəri 28 yaşlı forvardı Ağdam klubuna verdiklərini açıqlayıb: "Papiss Sisse ilə maraqlanırıq. Delarjı "Qarabağ”a verdik. Yasin Öztekinin meneceri ilə görüşdük, imza atılmadan transferi bitmiş hesab etməməliyik”.
Türkiyə mətbuatında yer alan xəbərlərdə "Qarabağ”ın "Bursaspor”a 200 min avro transfer haqqı ödədiyi bildirlir. Onun imzalayacağı müqavilənin müddəti və əmək haqqı açıqlanmır.
Delarj son zamanlar "Bursaspor"da oyunundan çox şəxsi həyatı ilə gündəmdə olub. Təcrübəli oyunçu daha bir il qüvvədə olan müqaviləsinə güvənərək, məşqlərə laqeyd yanaşıb. Bunun nəticəsində baş məşqçi Samet Aybaba ona əsas heyətdə yer verməyib. Konqolu forvard 2017-ci ildən çıxış etdiyi komandada 15 oyuna 4 qol vurub. Klub onu 700 min avroya satışa çıxarsa da, Ağdam klubu bu məbləği yarım milyon avroyadək endirə bilib.
Azərbaycan çempion hələlik transferi rəmsi şəkildə açıqlamayıb. Lakin onunla 3 illik müqavilənin bağlanılacağı bildirilir.
Qeyd edək ki, Con Delarj Kamerunun "Union Duala", Slovakiyanın "Dunayska Streda", Çexiyanın "Slovan" (Liberets), Avstriyanın "Admira" (Vakker) və icarə əsasında Türkiyənin "Osmanlıspor" klublarında da forma geyinib. O, "Bursaspor"a 2017-ci ilin avqustunda "Admira"dan 1,25 milyon avroya transfer olunub.
