AFFA İntizam Komitəsi 3 məşqçini cəzalandırıb.
Sportnet.az xəbər verir ki, Azərbaycan Premyer Liqasının V turunda "Zirə” – "Neftçi” matçının 45-ci dəqiqəsində texniki zonadan uzaqlaşdırılan hər iki komandanın baş məşqçiləri Samir Abasov və Roberto Bordinə bir-biriləri ilə sərt mübahisə etdiklərinə görə 1 oyun cəza verilib. Klublar isə 800 manat məbləğində cərimələnib.
Həmçinin Samir Abasova oyundan sonra təşkil olunan mətbuat konfransında 4-cü hakim Ömər Paşayev haqqında kinayə ilə danışdığına görə xəbərdarlıq olunub. Bu hal yenidən baş verəcəyi təqdirdə, "Zirə"nin baş məşqçisinə əlavə cəza tətbiq olunacaq.
