Avropa Millətlər Liqasının III tur matçında səfərdə Farer adaları ilə qarşılaşacaq Azərbaycan yığması rəqib meydanında dəstəksiz qalmayacaq.
Sportnet.az xəbər verir ki, Avropada fəaliyyət göstərən "Milli dəstə” fanklubunun üzvləri də matçın keçiriləcəyi Torshavn şəhərinə gəliblər.
Fanklubun rəhbəri Şamil Mustafayev bildirib ki, özü ilə birlikdə daha iki nəfər azərbaycanlı azarkeşi oyuna gətirib. Eyni zamanda, Torshavn şəhərində daha iki cənubi azərbaycanlı azarkeş onlara qoşulub və kiçik qrup sabah millinin oyununda olacaq.
Qeyd edək ki, oktyabrın 11-də keçiriləcək Farer adaları - Azərbaycan matçı Bakı vaxtı ilə saat 22:45-də başlanacaq.
