"Keşlə" ilə Topaz Premyer Liqasının XI tur oyunundan sonra istirahətə buraxılan "Sumqayıt" komandası hazırlıqları bərpa edib.
Sportnet.az-ın klubun rəsmi saytına istinadən məlumatına görə, "gənclik şəhəri" təmsilçisi yeni baş məşqçi Ayxan Abbasovun rəhbərliyi altında ilk məşqinə "Kapital Bank Arena"nın köməkçi meydançasında çıxıb. Milli komandalarda olan Əfran İsmayılov, Şəhriyar Əliyev, Süleyman Əhmədov və Murad Xaçayev məşqdə iştirak etməyib. Əvəzedici heyətdən isə 6 futbolçu əsas komanda ilə birlikdə hazırlaşıb.
1.5 saat davam edən məşqdə komanda üzvləri əvvəlcə müxtəlif fiziki hərəkətlər, ardınca isə topla hərəkətlər üzərində çalışıblar.
Qeyd edək ki, klubun rəsmi saytında dərc olunmuş fotolara əsasən, Ayxan Abbasovun yeni köməkçilərindən olan Mehman Yunusovun hazırlıq prosesinə qatılmadığı məlum olub.
