"Barselona" klubunun futbolçusu Lionel Messi İspaniya La Liqasında penalti ilə 50-ci qolunu vurub.
Sportnet.az-ın məlumatına görə, bu, XXII turun "Valensiya" ilə ev oyununa təsadüf edib. Komandası 0:2 hesabı ilə geridə olduğu vaxt - 39-cu dəqiqədə kapitan penaltini dəqiq yerinə yetirib. Bununla da Messi çempionat tarixində 3-cü pilləyə yüksəlib.
Dəqiq penalti sayında rekordçu hazırda İtaliya "Yuventus"unda çıxış edən Kriştianu Ronaldudur. Portuqaliyalı hücumçu "Real Madrid"də oynadığı vaxt 61 belə qol vurub. İkinci yeri isə "Atletiko", "Real Madrid" və "Rayo "Valyekano"nun sabiq oyunçusu Uqo Sançes 56 qolla qərarlaşıb.
Qeyd edək ki, "Barselona" "Valensiya" ilə görüşdə 2:2 hesablı heç-heçə edib. Kataloniya komandasının hər iki qolunu Lionel Messi vurub.
