İAvropa Liqasının I təsnifat mərhələsində Rumıniya "Universitatya"sı ilə cavab oyunu üçün səfərə çıxan "Səbail" komandası Krayova şəhərinə çatıb.
Sportnet.az-ın məlumatına görə, kollektiv əvvəlcə Türk Hava Yollarına məxsus Bakı - İstanbul - Buxarest təyyarə reysi ilə Rumıniya paytaxtına gedib. Oradan isə nümayəndə heyəti avtobusla matçın keçiriləcəyi şəhərədək 4 saatlıq yol qət edib.
Buxarest hava limanında "Səbail"in qanalı yarımmüdafiəçisi Maykl Essyenə maraq diqqətdən yayınmayıb. Yerli sakinlər ulduz futbolçu ilə şəkil çəkdiriblər. Heyətdə mərkəz müdafiəçisi Elvin Yunuszadə ağrıları üzündən son məşqləri buraxmalı olub. Lakin o da səfərə çıxanlar arasındadır. Yunuszadənin oyunadək hazır olacağına ümid bəslənilir.
Bu gün Bakı vaxtı ilə saat 20:00-da "Səbail"in görüşün keçiriləcəyi İon Oblemenko stadionunda məşqi və baş məşqçi Aftandil Hacıyevin mətbuat konfransı olacaq. Oyun isə iyulun 18-də eyni saatda başlanacaq.
