UEFA Çempionlar Liqasında VI turun ilk oyun gününə yekun vurulub.
Sportnet.az-ın məlumatına görə, 8 qarşılaşmanın yekununda 1/8 finala yüksələn daha 6 komandanın adı müəyyənləşib. Bunlar İngiltərənin "Liverpul" və "Çelsi", İspaniyanın "Valensiya", İtaliyanın "Napoli", Almaniyanın "Borussiya" (Dortmund) və Fransanın "Lion" klublarıdır. Qruplarda 3-cü yeri tutan Avstriya "Zaltsburq"u, İtaliya "İnter"i, Portuqaliya "Benfika"sı və Hollandiya "Ayaks"ı mübarizəni Avropa Liqasının 1/16 final mərhələsində davam etdirəcək. Belçikanın "Genk", Çexiyanın "Slaviya" (Praqa), Rusiyanın "Zenit" və Fransanın "Lill" kollektivləri isə qrupda qalıb.
Beləliklə, 1/8 finala yüksələn komandaların sayı 14-ə yüksəlib. Daha əvvəl bu vəsiqələri İspaniyanın "Barselona" və "Real Madrid, Almaniyanın "Bavariya" və "Leyptsiq", İngiltərənin "Mançester Siti", İtaliyanın "Yuventus" və Fransanın PSJ klubları əldə edib. Qalan 2 vəsiqənin sahibi ikinci oyun günündə müəyyənləşəcək.
--------------------------
UEFA Çempionlar Liqasında 1/8 finala yüksələn daha 2 komandanın adı müəyyənləşib. Sportnet.az-ın məlumatına görə, bunlar İngiltərə "Liverpul"u və İtaliya "Napoli"sidir.
E qrupunun son tur qarşılaşmalarında "Liverpul" Avstriyada "Zaltsburq"u 2:0 hesabı ilə məğlub edib. Görüşün taleyi 2 dəqiqə ərzində həll olunub. 57-ci dəqiqədə Nəbi Keyta, 58-ci dəqiqədə isə Məhəmməd Salah fərqlənib.
"Napoli" isə evdə Belçika "Genk"ini darmadağın edib - 4:0. İlk 3 qolu 3-cü, 26-cı və penalti ilə 38-ci dəqiqədə Arkadiuş Milik vurub. Son nöqtəni isə 75-ci dəqiqədə penaltidən Dris Mertens qoyub.
Beləliklə, "Liverpul" 13 xalla 1-ci, "Napoli" isə 12 xalla 2-ci yerin sahibi kimi Çempionlar Liqasında mərhələ adlayıb. 7 xalla 3-cü yeri tutan "Zaltsburq" mübarizəni Avropa Liqasının 1/16 finalında davam etdirəcək. 1 xalla sonuncu olan "Genk" isə qrupda qalıb.
--------------------
Bu gün UEFA Çempionlar Liqasının qrup mərhələsində sonuncu - VI turun oyunlarına start veriləcək. Sportnet.az-ın məlumatına görə, ilk oyun günündə E, F, G və H qrupundakı komandalar qarşılaşacaqlar.
Turnirin son qalibi İngiltərənin "Liverpul" klubu Avstriyada "Zaltsburq"un qonağı olacaq. Mersisayd təmsilçisi heç-heçə sayəsində digər görüşün nəticəsindən asılı olmayaraq növbəti mərhələyə yüksələcək. E qrupunun digər matçında "Napoli" İtaliyada Belçika "Genk"ini qəbul edəcək. Neapol təmsilçisi qələbə təqdirində, öz taleyini həll edəcək.
F qrupunda "Borussiya" (Dortmund) Almaniyada Çexiyanın "Slaviya" (Praqa) komandası ilə üz-üzə gələcək. Digər görüşdə növbəti mərhələni öncədən təmin etmiş İspaniyanın "Barselona" klubu İtaliyada "İnter"in qonağı olacaq. "İnter" və "Borussiya"nın xalı bərabərdir və son görüşlərdə hər iki kollektiv qələbə qazansa, şəxsi oyunlardakı üstünlüyə görə İtaliya klubu 1/8 finala yüksələcək.
Növbəti mərhələni təmin edən digər komanda Almaniya "Leyptsiq"i Fransada "Lion"la qarşılaşacaq. Portuqaliya "Benfika"sı isə Rusiyanın "Zenit" komandasını qəbul edəcək. Bu qrupda da "Zenit" və "Lion"un 7 xalı var. Hər iki komanda son görüşlərini qələbə ilə başa vursa, Sankt-Peterburq təmsilçisi şəxsi oyunlarda üstün olduğu üçün növbəti mərhələni təmin edəcək.
Nəhayət, H qrupunda İngiltərənin "Çelsi" komandası Fransa "Lill"ini qəbul edəcək. Digər görüşdə isə "Ayaks" Hollandiyada "Valensiya" ilə üz-üzə gələcək. London klubu doğma meydanda qələbə qazanaraq digər görüşün nəticəsindən asılı olmayaraq növbəti mərhələyə yüksələcək. "Ayaks"a isə heç-heçə də bəs edəcək.
Çempionlar Liqası
Qrup mərhələsi, VI tur
10 dekabr
E qrupu
21:55. "Napoli" (İtaliya) - "Genk" (Belçika) - 4:0
Qollar: Arkadiuş Minlik, 3; 26; 38-pen. Dris Mertens, 75-pen.
21:55. "Zaltsburq" (Avstriya) - "Liverpul" (İngiltərə) - 0:2
Qollar: Nəbi Keyta, 57. Məhəmməd Salah, 58
Xal durumu: "Liverpul" - 13, "Napoli" - 12, "Zaltsburq" - 7, "Genk" - 1.
F qrupu
24:00. "İnter" (İtaliya) - "Barselona" (İspaniya) - 1:2
Qollar: Romelu Lukaku, 44 - Karles Peres, 23. Ansu Fati, 87
24:00. "Borussiya" (Dortmund, Almaniya) - "Slaviya" (Praqa, Çexiya) - 2:1
Qollar: Ceydon Sanço, 10. Yulian Brandt, 61 - Tomaş Suçek, 43
Qırmızı vərəqə: Yulian Vayql, 77 ("Borussiya")
Xal durumu: "Barselona" - 14, "Borussiya" - 10, "İnter" - 7, "Slaviya" - 2
G qrupu
24:00. "Lion" (Fransa) - "Leyptsiq" (Almaniya) - 2:2
Qollar: Ussem Auar, 50. Memfis Depay, 82 - Emil Forsberq, 9-pen. Timo Verner, 33-pen.
24:00. "Benfika" (Portuqaliya) - "Zenit" (Rusiya) - 3:0
Qollar: Franko Servi, 47. Pitsi, 58-pen. Sərdar Azmun, 79-avtoqol
Qırmızı vərəqə: Duqlas Santos, 56 ("Zenit")
Xal durumu: "Leyptsiq" - 11, "Lion" - 8, "Benfika" - 7, "Zenit" - 7
H qrupu
24:00. "Çelsi" (İngiltərə) - "Lill" (Fransa) - 2:1
Qollar: Temmi Abraham, 10. Sesar Aspilikueta, 35 - Loik Remi, 78
24:00. "Ayaks" (Hollandiya) - "Valensiya" (İspaniya) - 0:1
Qol: Rodriqo, 24
Xal durumu: "Valensiya" - 11, "Çelsi" - 11, "Ayaks" - 10, "Lill" - 1.
