Futbol üzrə Azərbaycan Premyer Liqasında X tura yekun vurulub.
Sportnet.az-ın məlumatına görə, turun son oyununda "Sabah" klubu "Səbail"i 2:1 hesabı ilə məğlub edib.
"Bank Respublika Arena"dakı matçda komandalar meydana xüsusi pankartla çıxıblar. Pankartın üzərində Ordumuzun İkinci Qarabağ müharibəsindəki qələbəsini əks etdirən "Biz qayıtdıq, Qarabağ" şüarı yer alıb. Daha sonra Azərbaycan Respublikasının Dövlət Himni səsləndirilib.
Oyunda ilk qol 11-ci dəqiqədə vurulub. "Sabah"ın kapitanı Ruslan Abışovun ötürməsindən sonra rəqib qapıçı Nikolas Hagenlə üzbəüz çıxan Amadu Diallo çətinliklə də olsa topu tora göndərib. 33-cü dəqiqədə Amin Seydiyev mükəmməl zərbə ilə komandasının üstünlüyünü 2 topa çatdırıb. Matçın əsas vaxtına əlavə olunmuş 5-ci dəqiqədə Rauf Əliyev penaltidən fərqlənməklə fərqi azaldıb. Beləliklə, Masazır təmsilçisi 6 oyunluq məğlubiyyət seriyasından sonra qələbə qazanıb.
Bu nəticədən sonra xallarını 9-a çatdıran "Sabah" 7-ci pilləyə yüksəlib. Eyni xala malik "dənizçilər" isə 6-cı sıradakı mövqeyini qoruyub.
Qeyd edək ki, turun əvvəlki oyunlarında "Qarabağ" evdə "Sumqayıt"ı 3:1, "Neftçi" səfərdə "Qəbələ"ni 4:1, "Zirə" isə doğma meydanda "Keşlə"ni 3:1 hesabı ilə məğlub edib.
------------------------------------------------------------------
Bu gün Azərbaycan Premyer Liqasında X turun son oyunu keçiriləcək.
Sportnet.az-ın məlumatına görə, "Sabah" "Bank Respublika Arena"da "Səbail"lə qarşılaşacaq.
Noyabrın 21-nə nəzərdə tutulan, lakin qonaq komandanın heyətində 4 futbolçunun koronavirus testi müsbət çıxdığı üçün təxirə salınan qarşılaşma saat 16:00-da start götürəcək.
Son 6 matçda məğlub olan Masazır təmsilçisi 6 xalla sonuncu - 8-ci pillədə qərarlaşıb. Bir oyun az keçirən "dənizçilər" isə 9 xalla 6-cı sırada yer alıb.
İndiyədək ölkə çempionatında 8 dəfə üz-üzə gələn komandalar eyni sayda (3) qələbə qazanıblar. 2 görüş isə heç-heçə başa çatıb. Topların sayında meydan sahiblərinin minimal üstünlüyü var - 10:9. "Sabah" son 5 matçdan yalnız birində qol vura bilməyib. "Səbail" son 3 səfər oyununda qalib gəlməyib.
Azərbaycan Premyer Liqası
X tur
16:00. "Sabah" - "Səbail" - 2:1
Qollar: Amadu Diallo, 11, Amin Seydiyev, 33 - Rauf Əliyev, 90+5 (penalti)
Hakimlər: Rəşad Əhmədov, Cavanşir Yusifov, Eyyub İbrahimov, Rəhim Həsənov
Hakim-inspektor: Əmrah İbrahimov
AFFA nümayəndəsi: Erkin Hüseynov
"Bank Respublika Arena".
Qeyd edək ki, turun əvvəlki oyunlarında "Qarabağ" evdə "Sumqayıt"ı 3:1, "Neftçi" səfərdə "Qəbələ"ni 4:1, "Zirə" isə doğma meydanda "Keşlə"ni 3:1 hesabı ilə məğlub edib.
