Azərbaycan Premyer Liqasında XV turun daha bir oyunu keçirilib.
Sportnet.az-ın məlumatına görə, "Qarabağ" Tofiq Bəhramov adına Respublika stadionunda "Neftçi" ilə qarşılaşıb. Matç qonaqların 2:1 hesablı qələbısi ilə başa çatıb.
Görüş "ağ-qaralar" üçün yaxşı başlamayıb. 22-ci dəqiqədə sağ cinah müdafiəçisi Ömər Buludov rəqib komandanın kapitanı Maksim Medvedevə qarşı kobud oynayaraq meydandan qovulub. Amma flaqman azlıqda qalmasına baxmayaraq, 6 dəqiqə sonra Namik Ələskərovun qolu ilə hesabı açıb. İlk hissə bu hesabla başa çatıb. İkinci yarıya fəal başlayan "Qarabağ" 58-ci dəqiqədə tarazlığı bərpa edib. Cərimə meydançasındakı qarışıqlıqdan istifadə edən Mahir Emreli fərqlənib.
72-ci dəqiqədə "Qarabağ"ın cərimə meydançasında "köhlən atlar"ın müdafiəçii Kevin Medina ilə qonaq komandanın yarımmüdafiəçisi Mamadu Kane arasında dava düşüb. Rəqibini vuran Medina birbaşa qırmızı vərəqə ilə meydandan qovulub. Ardınca isə Kane ikinci sarı vərəqəni görərək, komandasını azlıqda qoyub. 75-ci dəqiqədə təyin olunmuş penaltini dəqiq yerinə yetirən Namik Ələskərov komandasına vacib qələbə qazandırıb. Matçın əsas vaxtına əlavə olunmuş 3-cü dəqiqədə "ağ-qaralar" meydan 8 nəfərlə qalıb. Voislav Stankoviç ikinci sarı vərəqəni görərək meydanı tərk edib.
Bu nəticədən sonra xallarını 30-a çatdıran "Neftçi" liderliyə yüksəlib. "Qarabağ" isə 29 xalla 2-ci sırada qalıb.
Qeyd edək ki, günün ilk oyununda "Sumqayıt" evdə "Səbail"ə 3:0 hesabı ilə qalib gəlib. Tura sabah keçiriləcək "Qəbələ" - "Keşlə" və "Zirə" - "Sabah" matçları ilə yekun vurulacaq.
--------------------
Azərbaycan Premyer Liqasında üçüncü dövrəyə start verilib.
Sportnet.az-ın məlumatına görə, XV turun açılış matçında "Sumqayıt" və "Səbail" komandaları üz-üzə gəlib. "Kapital Bank Arena"da keçirilmiş görüş meydan sahiblərinin böyük hesablı qələbəsi ilə yekunlaşıb - 3:0.
İlk topu 26-cı dəqiqədə Murad Xaçayev vurub. Bundan 7 dəqiqə sonra Tellur Mütəllimov baxımlı qola imza atıb.
55-ci dəqiqədə Peyman Keşavarzi qırmızı vərəqə alaraq, qonaq komandanı azlıqda qoyub. Oyunda son nöqtəni isə 83-cü dəqiqədə penaltidən Əli Qurbani qoyub.
"Səbail" oyunu 9 nəfərlə başa vurub. 90+5-ci dəqiqədə Kamran Ağayev kobud oyuna görə qırmızı vərəqə alıb. Bu vaxt qonaqlar hər 3 oyunçu dəyişikliyindən istifadə etdiyi üçün üçün qapıya müdafiəçi Adil Nağıyev keçib.
Bu qələbə sayəsində "Sumqayıt" xalını 22-yə çatdırsa da, 4-cü pillədə qalıb. "Səbail" isə 13 xalla 6-cıdır.
Qeyd edək ki, bu günün digər matçında "Qarabağ" və "Neftçi" komandaları üz-üzə gələ gələcək. Tofiq Bəhramov adına Respublika stadionunda keçiriləcək görüş saat 18:00-da başlanacaq. Fevralın 14-də isə "Qəbələ" "Keşlə"ni, "Zirə" "Sabah"ı qəbul edəcək.
--------------------------
Bu gün Azərbaycan Premyer Liqasında XV tura start veriləcək.
Sportnet.az-ın məlumatına görə, günün ilk matçı Sumqayıtda gerçəkləşəcək.
Şəhərin eyniadlı komandası kubokda mübarizədən kənarlaşdırdığı "Səbail"i qəbul edəcək. Paytaxt klubu 14 oyundan sonra 13 xalla 6 - 8-ci yerləri bölüşdürür. "Gənclik şəhəri" təmsilçisi 19 xalla 4-cü pillədə qərarlaşıb.
Komandalar Premyer Liqada 12 dəfə üz-üzə gəliblər. Hər iki kollektiv 5 dəfə meydanı 3 xalla tərk edib. İki görüşdə isə qalib müəyyənləşməyib. Topların fərqində "Səbail" minimal üstünlüyə sahibdir - 12:11. “Sumqayıt” rəqibinə qarşı son üç oyunda meydanı qolsuz tərk etməyib. Qonaqlar səfərdəki son üç matçda qol vurmağı bacarıb.
Günün digər qarşılaşmasında Azərbaycan derbisi baş tutacaq. Son ölkə çempionu "Qarabağ" ən yaxın izləyicisi olan "Neftçi"ni qəbul edəcək. Ağdam klubu 29 xalla liderdir, flaqman isə rəqibindən 2 xal geri qalır. Meydan sahiblərində zədəli Filip Ozobiç, qonaqlarda kollektivə gec qoşulan Yusuf Laval meydana çıxmayacaq.
Komandalar Azərbaycan çempionatlarında 81 dəfə qarşılaşıblar. 30 oyunda "köhlən atlar", 21-də isə "ağ-qaralar" qələbə qazanıb. 30 qarşılaşmada bərabərlik qeydə alınıb. Topların fərqində də "Qarabağ"ın aşkar üstünlüyü var - 91:73. "Qarabağ" çempionatda rəqibinə qarşı son 5 oyunun yalnız 1-də top buraxıb. “Neftçi” isə son 7 matçda 1 qələbə qazana bilib.
Azərbaycan Premyer Liqası, XV tur
3 fevral (şənbə)
16:00. “Sumqayıt” – “Səbail” - 3:0
Qollar: Murad Xaçayev, 26. Tellur Mütəllimov, 33. Əli Qurbani, 83 (pen.)
Qırmızı vərəqələr: Peyman Keşavarzi, 55. Kamran Ağayev, 90+5 (hər ikisi "Səbail")
Hakimlər: Vüqar Həsənli, Zeynal Zeynalov, Cəmil Quliyev, Fərid Hacıyev
Hakim-inspektor: Anar Salmanov
AFFA nümayəndəsi: Seymur Səlimli
Sumqayıt, "Kapital Bank Arena"
18:30. “Qarabağ” – “Neftçi” - 1:2
Qollar: Mahir Emreli, 58 - Namik Ələsgərov, 28, 75 (penalti)
Hakimlər: Elçin Məsiyev, Elşad Abdullayev, Pərvin Talıbov, Əliyar Ağayev
Qırmızı vərəqələr: Ömər Buludov ("Neftçi"), 22, Kevin Medina ("Qarabağ"), 72, Mamadu Kane, ("Neftçi"), 74, Voislav Stankoviç ("Neftçi"), 99+3
Hakim-inspektor: Babək Quliyev
AFFA nümayəndəsi: Kərim Ağayev
Bakı, Tofiq Bəhramov adına Respublika Stadionu.
Qeyd edək ki, XV turun digər iki oyunu fevralın 14-də olacaq. "Qəbələ" "Keşlə"ni, "Zirə" "Sabah"ı qəbul edəcək.
