Azərbaycan Premyer Liqasında XVIII turun daha bir oyunu keçirilib.
Sportnet.az-ın məlumatına görə, "Qarabağ" "Azersun Arena"da "Qəbələ" ilə qarşılaşıb. Görüş meydan sahiblərinin 3:0 hesablı qələbəsi ilə başa çatıb.
Matçda ilk qolu 22-ci dəqiqədə Ağdam klubunun heyətində Filip Ozobiç vurub. Xorvatiyalı yarımmüdafiəçi 12 dəqiqə sonra penaltidən fərqlənməklə həm dubl edib, həm də komandasının üstünlüyünü 2 topa çatdırıb. 38-ci dəqiqə Mahir Emreli 3-cü qolu rəqibin qapısından keçirib. 62-ci dəqiqədə qonaqların albaniyalı müdafiəçisi Yurgen Qoxa zədələnərək meydanı tərk edib. Onu Ehtiram Şahvediyev əvəzləyib.
Bu qələbədən sonra xallarını 36-ya çatdıran "Qarabağ" liderliyə yüksəlib. "Qəbələ" isə 21 xalla 5-ci pillədə qalib.
Qeyd edək ki, günün ilk oyununda "Səbail" evdə "Keşlə" ilə heç-heçə edib - 1:1. Tura sabah keçiriləcək "Sumqayıt" - "Zirə" və "Neftçi" - "Sabah" matçları ilə yekun vurulacaq.
-------------------
Futbol üzrə Azərbaycan Premyer Liqasında XVIII tura start verilib.
Sportnet.az xəbər verir ki, turun açılış maçtında "Səbail" "Keşlə"ni qəbul edib.
"ASCO Arena"dakı oyun 1:1 hesabı ilə yekunlaşıb. "Keşlə"nin heyətində Tural Axundov 54-cü dəqiqədə hesabı açıb. Meydan sahibləri bu qola 75-ci dəqiqədə cavab verə bilib. İranlı futbolçu Peyman Keşavarzi başla dəqiq oynayıb.
Bu nəticədən sonra "Səbail" 17-ci, "Keşlə" isə 16-cı xalını qazanıb. Komandalar müvafiq olaraq 6 və 7-ci yerdədir.
Qeyd edək ki, günün digər matçında "Qarabağ" "Qəbələ" ilə üz-üzə gələcək. XVIII tura sabah keçiriləcək "Sumqayıt" - "Zirə" və "Neftçi" - "Sabah" matçları ilə yekun vurulacaq.
-----------------------------------------------------------
Bu gün Azərbaycan Premyer Liqasında XVIII tura start veriləcək. Sportnet.az-ın məlumatına görə, ilk oyun günündə iki qarşılaşma keçiriləcək.
Turun açılış matçında "Səbail" "Keşlə"ni qəbul edəcək. "ASCO Arena"dakı görüşü FIFA referisi Əliyar Ağayev idarə edəcək.
Hazırda "dənizçilər" 16 xalla 6-cı, qonaqlar isə 15 xalla 7-cidir. Komandalar indiyədək Premyer Liqada 13 dəfə üz-üzə gəliblər. Bunların 7-də "Səbail", 3-də isə "Keşlə" meydanı 3 xalla tərk edib. Topların nisbətində də meydan sahibləri üstündür - 16:11. “Keşlə” 5 oyundur ki, bu rəqibi üzərində qələbə qazana bilmir. “Səbail” isə son 3 ev matçında qalib gəlməyib.
"Dənizçilər"dən Urfan Abbasov sarı vərəqə limitini doldurduğu üçün görüşdə iştirak etməyəcək. Qonaqlarda isə Sadio Tounkara zədə, Silvio Rodrigues cəza səbəbindən oynamayacaq.
Günün digər matçında son çempion "Qarabağ" "Qəbələ"ni qəbul edəcək. "Azersun Arena"dakı oyunda Kamal Umudlu baş hakim olacaq.
Hazırda 33 xalı olan Ağdam təmsilçisi "Neftçi" ilə birlikdə 1-2-ci yerləri bölüşdürür. "Qırmızı-qaralar" isə 21 xalla 5-ci pillədə qərarlaşıb.
Çempionatda komandaların 48 görüşündən 24-də "köhlən-atlar", 10-da isə qonaqlar qələbə qazanıb. Topların nisbətində də "Qarabağ"ın aşkar üstünlüyü var - 68:42. 10 matçdır Premyer Liqada rəqibinə uduzmayan “Qarabağ” son 9 oyunda meydanı qolsuz tərk etməyib. “Qəbələ” isə son 4 səfər matçında xal qazana bilmir.
Ağdam klubunda Kevin Medina cəza, Rahil Məmmədov isə zədə səbəbindən oyunu buraxacaq. "Qırmızı-qaralar"da isə Cavid Hüseynov və Rafael Utriq cəzalıdır.
2 mart (çərşənbə axşamı)
16:00. “Səbail” –“Keşlə” - 1:1
Qol: Peyman Keşevarzi, 75 - Tural Axundov, 54
Hakimlər: Əliyar Ağayev, Akif Əmirəli, Zeynal Zeynalov, Rəhim Həsənov
Hakim-inspektor: Babək Quliyev
AFFA nümayəndəsi: Aslan Şahgəldiyev
“ASCO Arena”
18:15. “Qarabağ” – “Qəbələ” - 3:0
Qollar Filip Ozobiç, 22, 34 (penalti), Mahir Emreli, 38
Hakimlər: Kamal Umudlu, Kamran Bayramov, Eyyub İbrahimov, Rövşən Rəcəbov
Hakim-inspektor: Ömər Paşayev
AFFA nümayəndəsi: Mübariz Hüseynov
“Azersun Arena”.
Qeyd edək ki, turun digər iki matçı martın 3-də olacaq. "Neftçi" "Sabah"ı, "Sumqayıt" isə "Zirə"ni qəbul edəcək.
