"Zirə" UEFA Konfrans Liqasının II təsnifat mərhələsində cavab görüşünə çıxıb.
Sportnet.az-ın məlumatına görə, Rəşad Sadıqovun baş məşqçi olduğu komanda İsraildə "Makkabi" (Təl-Əviv) klubu ilə qarşılaşıb. Təl-Əvivdəki "Blumfild" stadionunda oynanılan qarşılaşma qolsuz heç-heçə ilə başa çatıb.
Oyuna yaxşı başlayan "qartallar" bir neçə epizodda rəqibə təhlükə yaşadıb. Əvvəlcə Rüstəm Əhmədzadə əlverişli fürsəti əldən verib. Az sonra Hamidu Keyta 2 müdafiəçini keçib qapı istiqamətində zərbə endirsə də, top dirəyin üstündən keçib. Ardınca isə Coşqun Diniyevin uzaq məsafədən qüvvətili zərbəsində azacıq dəqiqlik çatmayıb. Hissənin sonlarına doğru fəallığı artıran meydan sahibləri Brendli Kuvasla qola yaxın olsa da, müdafiəçilər təhlükəni sovuşdura biliblər.
İkinci yarı da qarşılıqlı hücumlarla başlayıb. 50-ci dəqiqədə Əhmədzadənin başla vurduğu top qapının üstündən keçib. 7 dəqiqə sonra Kuvas Mehdi Cənnətovla üzbəüz qalsa da, qolkiper qola imkan verməyib. 74-cü dəqiqədə Azərbaycan millisinin qapıçısı növbəti dəfə komandasını qoldan xilas edib. "Makkabi" son dəqiqələrdə təzyiqi artırsa da, oyunda qol vurulmayıb.
Beləliklə, "Zirə" Bakıdakı ilk matçda rəqibinə 0:3 hesabı ilə uduzduğundan Konfrans Liqasında mübarizəni dayandırıb.
----------------------------------
"Neftçi" UEFA Konfrans Liqasında növbəti mərhələyə yüksəlib.
Sportnet.az-ın məlumatına görə, Laurentsiu Regekampfın baş məşqçi olduğu komanda II təsnifat mərhələsinin cavab oyununda Bakıda Kiprin "Aris" klubu ilə qarşılaşıb.
Səfərdə 0:2 hesabı ilə uduzan "ağ-qaralar" rəqibinə 3 cavabsız qalib gəlib. Qolları 38-ci dəqiqədə Qodsvey Donyo, 57-ci dəqiqədə Eddi İsrafilov və 62-ci dəqiqədə Kenni Sayef vurub.
83-cü dəqiqədə qonaqların heyətində Morqan Braun ikinci sarı vərəqəni alaraq meydandan qovulub.
Beləliklə, "Neftçi" Konfrans Liqasında III təsnifat mərhələsinə yüksəlib. Azərbaycan təmsilçisi növbəti raundda "Rapid" (Vyana, Avstriya) - "Lexiya" (Qdansk, Polşa) cütünün qalibi ilə üz-üzə gələcək.
--------------------------------------
"Qəbələ" və Macarıstan "Fehervar"ı arasında UEFA Konfrans Liqasının II təsnifat mərhələsinin cavab görüşünə çıxıb.
Sportnet.az-ın məlumatına görə, Qəbələ şəhər stadionunda keçirilmiş qarşılaşma meydan sahiblərinin qələbəsi ilə yekunlaşıb - 2:1.
Avstriyalı referi Kristofer Yegerin idarə etdiyi oyun meydan sahiblərinin sürətli hücumları ilə başlayıb. Komandanın yeni transferi Felipe Santos qısa zaman kəsiyində iki əlverişli imkanı qaçırıb. 5-ci dəqiqədə "sambaçı"nın zərbəsi qapının yanından keçibsə, 15-ci dəqiqədə rəqib qapıçı Daniel Kovaç onun təkbətəkdən fərqlənməsinə imkan verməyib.
Rəqib isə ilk real qol imkanını 22-ci dəqiqədə yaradıb. "Qəbələ"nin kapitanı Asif Məmmədovdan topu "oğurlayan" Klaudiu Bumbanın zərbəsi qapıdan aralı keçib.
27-ci dəqiqədə isə meydan sahiblərinin futbolçusu Rafael Utziqin iti bucaq altından vuruşunda azacıq dəqiqlik çatışmayıb.
31-ci dəqiqədə isə "Fehervar" real şansı qaçırıb. Künc zərbəsindən sonra Nikola Serafimovun zərbəsi qapı tirinə tuş gəlib.
34-cü dəqiqədə isə "Qəbələ" hesabı açıb. Rövlan Muradov kombinasiyalı hücumdan sonra topu uzaq küncə göndərib - 1:0.
Bundan az sonra İsnik Aliminin Klaudiu Bumbaya qarşı kobud oynadığını bildirən referi penalti təyin edib. Lakin 41-ci dəqiqədə topa yaxınlaşan Loik Neqo zərbəni qapının üstündən vurub.
Əvəzində 44-cü dəqiqədə Bumbanın ötürməsindən sonra Budu Zivzivadze bərabərlik qoluna imza atıb - 1:1.
Beləliklə, komandalar fasiləyə 1:1 hesablı heç-heçə ilə çıxıblar.
İkinci hissənin əvvəllərində də "Qəbələ" fəal təsir bağışlayıb. 51-ci dəqiqədə meydan sahiblərinin hücumu zamanı Ruan Renatonun zərbəsi qapı dirəyinə tuş gəlib.
65-ci dəqiqədə isə "Fehervar"ın hücumu zamanı künc zərbəsindən sonra rəqib komandanın kapitanı Attila Fiolanın başla zərbəsində eyni hal baş verib.
Bundan 1 dəqiqə sonra meydan sahiblərinin hücumunu Rafael Utziqin baş zərbəsi ilə tamamlanıb. Lakin top qapıçının üstünə gedib.
70-ci dəqiqədə isə Muradovun cərimə zərbəsindən endirdiyi top qapı tirini hədəf alıb. Bundan 1 dəqiqə sonra onun yerinə yetirdiyi növbəti cərimə zərbəsindən sonra qapı qarşısında topa toxunan olmayıb.
73-cü dəqiqədə isə Felipe Santos əks-hücum zamanı rəqib müdafiəçiləri də keçərək, təkbətəkdən fərqlənməyi bacarıb - 2:1.
Qalan dəqiqələrdə "Qəbələ"nin fərqi artırmaq, "Fehervar"ın isə yenidən bərabərlik qolunu vurmaq üçün cəhdləri nəticə verməyib. İlk matçda Macarıstan təmsilçisi 4:1 hesabı ilə qalib gəldiyi üçün iki oyunun yekununda 2:5 hesabı ilə uduzan Azərbaycan təmsilçisi mübarizəni dayandırıb.
Bununla belə, "qırmızı-qaralar" ölkə aktivinə 0,250 xal yazdırmağı bacarıb.
------------------------
Bu gün UEFA Konfrans Liqasında II təsnifat mərhələsinə yekun vurulacaq.
Sportnet.az-ın məlumatına görə, Azərbaycan təmsilçiləri - "Neftçi", "Qəbələ" və "Zirə" də cavab oyunlarını keçirəcək.
Əvvəlcə Qəbələnin eyniadlı təmsilçisi evdə Macarıstan "Fehervar"ını qəbul edəcək. Saat 20:00-da başlayacaq matçı avstriyalı FIFA referisi Kristofer Yager idarə edəcək. "Qırmızı-qaralar" ilk görüşdə 1:4 hesabı ilə uduzub.
"Neftçi" "Bakcell Arena"da Kipr "Aris"ini sınağa çəkəcək. Saat 21:00-da start götürəcək qarşılaşmanın baş hakimi almaniyalı Bastian Dankert olacaq. "Ağ-qaralar" Larnakadakı ilk matçda məğlub olub - 0:2.
"Zirə" isə İsraildə "Makkabi" (Təl-Əviv) komandasının qonağı olacaq. "Blumfild" stadionundakı oyun Bakı vaxtı ilə saat 21:30-da başlayacaq. Matçda ədaləti xorvatiyalı FIFA referisi Mario Zebets qoruyacaq. "Qartallar" Bakıdakı ilk görüşdə 0:3 hesabı ilə uduzub.
UEFA Konfrans Liqası
II təsnifat mərhələsi, cavab oyunları
20:00. "Qəbələ" (Azərbaycan) - "Fehervar" (Macarıstan) - 2:1
Qollar: Rövlan Muradov, 34. Felipe Santos, 73 - Budu Zivzivadze, 44
İstifadə olunmamış penalti: Loik Neqo, 41 ("Fehervar")
Hakimlər: Kristofer Yager, Robert Ştaynaxer, Santino Şrayner, Markus Hameter (Avstriya)
Qəbələ şəhər stadionu
İlk oyun - 1:4
21:00. "Neftçi" (Azərbaycan) - "Aris" (Kipr) - 3:0
Qollar: Qodsvey Donyo, 38. Eddi İsrafilov, 57. Kenni Sayef, 62
Hakimlər: Bastian Dankert, Yan Zaydel, Eduard Baytinger, Sven Yablonski (Almaniya)
Bakı, "Bakcell Arena"
İlk oyun - 0:2
21:30. "Makkabi" (Təl-Əviv, İsrail) - "Zirə" (Azərbaycan) - 0:0
Hakimlər: Mario Zebets, Xrvoe Radiç, Luka Puşiç, Ante Çulyak (Xorvatiya)
Təl-Əviv, "Blumfild" stadionu
İlk oyun - 3:0
Qeyd edək ki, "Qəbələ" - "Fehervar" cütünün III təsnifat mərhələsində “Petrokub-Hinçesti” (Moldova) / “Laçi” (Albaniya) cütünün güclüsü, "Neftçi" - "Aris" cütünün qalibi “Rapid” (Vyana, Avstriya) / “Lexiya” (Qdansk, Polşa) cütünün güclüsü, "Makkabi" - "Zirə" cütünün qalibi isə Yunanıstanın "Aris" (Saloniki) klubu ilə qarşılaşacaq.
