Futbol üzrə Azərbaycan Premyer Liqasında III turun daha bir oyunu keçirilib.
Sportnet.az-ın məlumatına görə, günün yeganə matçında "Neftçi" "Sabah"ın qonağı olub. "Bank Respublika Arena"dakı qarşılaşma meydan sahiblərinin 2:1 hesablı qələbəsi ilə yekunlaşıb.
37-ci dəqiqədə Murad Musayevin baş məşqçi olduğu komanda 11 metrlik cərimə zərbəsindən yararlana bilməyib. Kristian Sebalyosun vurduğu topu "ağ-qaralar"ın qapıçısı İvan Brkiç çıxarıb. Hesabı ilk hissənin əsas vaxtına əlavə olunmuş 2-ci dəqiqədə qonaqların yarımmüdafiəçisi Yusuf Laval açıb.
78-ci dəqiqədə "Sabah"dan Aleksey İsayev penaltidən tarazlığı bərpa edib. Əsas vaxta əlavə olunmuş 1-ci dəqiqədə isə Emanuel Apeh penaltini dəqiq yerinə yetirməklə, komandasına qələbə qazandırıb.
Bu, "Sabah"ın evdə "Neftçi" üzərində ilk qələbəsi olub.
Bu qələbədən sonra xallarını 9-a çatdıran "Sabah" liderliyini möhkəmlədib. "Neftçi" isə 6 xalla 2-ci pillədə qərarlaşıb.
Qeyd edək ki, turun açılış matçında "Şamaxı" evdə "Səbail"lə 1:1 hesablı heç-heçə edib. Avqustun 21-də "Kəpəz" "Qəbələ" ilə, "Zirə" "Sumqayıt"la qarşılaşacaq. "Turan Tovuz" - "Qarabağ" matçı isə "köhlən atlar"ın Çexiyada "Viktoriya" (Plzen) komandasına qarşı keçirəcəyi UEFA Çempionlar Liqasının pley-off mərhələsinin cavab oyununa daha yaxşı hazırlaşa bilməsi səbəbindən təxirə salınıb.
-------------------------------------
Bu gün futbol üzrə Azərbaycan Premyer Liqasında III turun daha bir oyunu keçiriləcək.
Sportnet.az-ın məlumatına görə, günün yeganə matçı "Bank Respublika Arena"da baş tutacaq. Mərkəzi qarşılaşmada "Sabah" "Neftçi"ni sınağa çəkəcək. 6 xala malik komandalar turnir cədvəlində 1-2-ci yerləri bölüşdürürlər.
Paytaxt təmsilçiləri bunadək ölkə çempionatında 15 dəfə üz-üzə gəliblər. "Sabah" bu matçlarda cəmi 1 qələbə qazanıb. "Neftçi" isə 12 oyunda rəqibindən üstün olub. 2 görüşdə qalib müəyyənləşməyib. "Ağ-qaralar"ın 28 qoluna Murad Musayevin rəhbərlik etdiyi kollektiv cəmi 8 topla cavab verib.
“Neftçi” bütün oyunlarda qol vurub. “Sabah” evdə qələbə qazanmayıb.
Azərbaycan Premyer Liqası
III tur
20 avqust
20:30. "Sabah" – "Neftçi" - 2:1
Qollar: Aleksey İsayev, 78 (penalti). Emanuel Apeh, 90+1 (penalti) - Yusuf Laval, 45+2
İstifadə olunmayan penalti: Kristian Sebalyos, 37 ("Sabah")
Hakimlər: Fərid Hacıyev, Rəhman İmami, Kamran Bayramov, Tural Qurbanov
Hakim-inspektor: Zöhrab Qədiyev
"Bank Respublika Arena".
Qeyd edək ki, turun açılış matçında "Şamaxı" evdə "Səbail"lə 1:1 hesablı heç-heçə edib. Avqustun 21-də "Kəpəz" "Qəbələ" ilə, "Zirə" "Sumqayıt"la qarşılaşacaq. "Turan Tovuz" - "Qarabağ" matçı isə "köhlən atlar"ın Çexiyada "Viktoriya" (Plzen) komandasına qarşı keçirəcəyi UEFA Çempionlar Liqasının pley-off mərhələsinin cavab oyununa daha yaxşı hazırlaşa bilməsi səbəbindən təxirə salınıb. Bakıdakı ilk qarşılaşmada hesab açılmayıb.
