"Neftçi”nin baş məşqçisi Böyükağa Hacıyev Səudiyyə Ərəbistanının "Al Qadisiyah” komandası ilə keçirdikləri yoxlama matçı barədə danışıb. Sportnet.az-ın məlumatına görə, flaqmanın rəsmi saytına açıqlama verən Hacıyev 3:1 hesablı qələbəyə rəğmən çoxsaylı qol imkanından yararlana bilmədiklərini açıqlayıb.
O deyib: "Rəqib tanımadığımız komanda, bizim üçün qapalı sandıq idi. Hesabda geri düşsək də, futbolçularımız 3 qol vura bildilər. Ümumiyyətlə, çoxsaylı qol imkanlarından istifadə edə bilmədik. Bununla belə, komandanın hazırlığından razıyam".
Hacıyev bildirib ki, əsas məqsəd Avropa Liqasının II təsnifat mərhələsinə hazırlıqdır: "Bu yöndə işlərimiz gedir. Azarkeşlər yeni mövsümdə də "Neftçi”nin timsalında mübariz bir komanda görəcəklər”.
Qeyd edək ki, "Neftçi"nin Avroliqadakı rəqibi I təsnifat mərhələsində Sloveniya "Koper"i ilə Çernoqoriya "Çelik"i arasındakı qarşılaşmaların qalibi olacaq. Flaqman II təsnifat mərhələsində ilk görüşünü iyunun 17-də səfərdə, cavab matçını isə bir həftə sonra Bakıda keçirəcək.
