Şahmat üzrə dünya çempionu və "ShamkirChess 2018"in qalibi Maqnus Karlsen Bakıda "Formula 1" yarışının keçirilməsindən xəbərsizdir.
Sportnet.az xəbər verir ki, bu barədə 28 yaşlı qrossmeysterin özü bildirib. Norveçli şahmatçının sözlərinə görə, Azərbaycan Qran Prisindən xəbəri olsaydı, Şəmkirdən paytaxta gələrək, yarışı izləyərdi. Əvəzində o, Şəmkir ətrafındakı görməli yerləri izləməyi qərara alıb. Karlsen aprelin 28-də başa çatmış superturnirdən dərhal sonra Azərbaycanı tərk etməməsini Osloya təyyarə reyslərinin gec tarixdə olması ilə əlaqələndirib.
Qeyd edək ki, Maqnus Karlsen 10 qrossmeysterin qatıldığı "ShamkirChess"də 6 xalla 1-ci yeri tutub.
