Azərbaycan millisinin baş məşqçisi Fernandu Santuş "Qarabağ"ı Çempionlar Liqasının Liqa mərhələsinə vəsiqə qazandığı üçün təbrik edib.
Sportnet.az-ın məlumatına görə, portuqaliyalı mütəxəssis bununla bağlı AFFA-da keçirdiyi mətbuat konfransında açıqlama verib.
Santuşun fikrincə, bu, "Qarabağ" və Azərbaycan üçün üçün çox vacib nəticədir: "Başda Qurban Qurbanov olmaqla, komandanın bütün heyətini, oyunçularını təbrik etmək istəyirəm. Əlbəttə, bu, Azərbaycan üçün də çox böyük nailiyyətdir. Çünki Avropada hamı bir müddət "Qarabağ" və Azərbaycan barədə danışacaq".
O, "Qarabağ"ın Liqa mərhələsindəki şansları barədə də danışıb: "Sözsüz ki, heç də asan olmayacaq. Açıq-aşkar güclü rəqiblərdirlər. "Qarabağ" layiqli şəkildə gəlib ora çıxıb və əllərindən gələni edəcəklər ki, Azərbaycanı da layiqincə təmsil etsinlər. Neçə xal toplayacaqları barədə heç nə deyə bilmərəm, şərhim yoxdur. "Qarabağ"a uğurlar arzulayır, çox yaxşı, uğurlu çıxış edəcəyinə ümidvar olduğumu bildirirəm. Mən və bütün ölkə bunu gözləyir".
Qeyd edək ki, "Qarabağ" Çempionlar Liqasının Liqa mərhələsində İngiltərənin "Çelsi", Almaniyanın "Ayntraxt", Niderlandın "Ayaks" və Danimarkanın "Kopenhagen" klubları ilə evdə qarşılaşacaq. Səfər oyunlarına gəlincə, Ağdam komandası İngiltərədə "Liverpul"un, Portuqaliyada "Benfika"nın, İtaliyada "Napoli"nin, İspaniyada "Atletik Bilbao"nun qonağı olacaq. Oyunların dəqiq təqvimi avqustun 30-da açıqlanacaq.
