"Avropa çempionatında iştirak edəcək hər kəsə uğurlar arzulayıram. Bu yarış bizim üçün yaxşı təcrübə olacaq. Çalışacağıq ki, uğurlu nəticə qazanaq”. Bunu Sportnet.az-a açıqlamasında Belçikanın 17 yaşadək futbolçulardan ibarət milli komandasının kapitanı Zinyo Vanhözden deyib.
Vanhözden A qrupunda təşkilatçı Azərbaycanın və ya Şotlandiyanın yox, Portuqaliyanın favorit olması fikri ilə razılaşmayıb: "Portuqaliyanın bu qrupun aşkar favoriti olduğunu düşünmürəm. Bəli, onların çox yaxşı komandaları var. Amma biz də zəif deyilik”.
Vanhözden Azərbaycan yığması haqda da danışıb: "Çempionatdakı hər bir komanda güclüdür. Amma Azərbaycan yığması haqda geniş məlumata sahib deyiləm. Komandanızın nəyə qadir olduğunu ilk oyunda görəcəyik”.
Qeyd edək ki, Azərbaycan millisi ilk oyununu mayın 5-də Portuqaliyaya qarşı keçirəcək. Həmin gün Belçika Şotlandiya ilə üz-üzə gələcək.
