17 yaşadək futbolçulardan ibarət yığma komandalar arasında UEFA Avropa çempionatı Azərbaycan-2016 turnirinin iştirakçıları mətbuat konfransı keçirəcəklər. Sportnet.az-ın məlumatına görə, mayın 4-də, saat 11:00-da, Bulvar otelin Tağıyev-2 zalında B qrupunda çıxış edən komandaların - Ukrayna, Almaniya, Avstriya, Bosniya və Herseqovina yığmalarının baş məşqçiləri media nümayəndələrinin suallarını cavablandıracaqlar.
Almaniya yığmasından media önünə əslən azərbaycanlı futbolçu Renat Dadaşov da çıxacaq. O, əvvəllər Azərbaycanın əsas millisində çıxış etmiş Rüfət Dadaşovun qardaşıdır. Almaniyada ailəsi ilə birgə yaşayan Renat iki il əvvəl 16 yaşadək futbolçulardan ibarət yığmamıza da cəlb olunub. Lakin o, sonradan Almaniya millisində oynamağa qərar verib.
Saat 11:30-da isə A qrupunda mübarizə aparacaq yığmaların - Azərbaycan, Portuqaliya, Belçika, Şotlandiya millilərinin baş məşqçiləri jurnalistlər qarşısına çıxacaqlar.
Qeyd edək ki, Avropa çempionatının final mərhələsi oyunları mayın 5-dək 22-dək keçiriləcək.
