"Qəbələ" klubu Avropa Liqasının I təsnifat mərhələsində Gürcüstan "Samtredia"sı ilə ilk oyununu səfərdə keçirəcək. Bu barədə Sportnet.az-a Azərbaycan klubunun vitse-prezidenti Fariz Nəcəfov məlumat verib.
Onun sözlərinə görə, UEFA müvafiq qərarı tezliklə verəcək: "Hazırda "Qəbələ" Gürcüstanın paytaxtı Tbilisidə təlim-məşq toplanışındadır. Püşkə əsasən, "qırmızı-qaralar" ilk oyunu evdə keçirməlidirlər. Lakin oyunların yerləri dəyişəcək. Çünki biz də ev stadionu kimi "Bakcell Arena"nı sifariş etmişik. Püşkə əsasən, bu arenanın sahibi "Neftçi" də ilk oyununu evdə keçirməlidir. Bu halda, qaydalara əsasən, biz mübarizəyə səfər qarşılaşması ilə başlamalıyıq. Yəqin ki, UEFA tezliklə müvafiq qərarı qəbul edəcək. Mübarizəyə səfər oyunu ilə başlasaq, komandamız Gürcüstanda oyunu keçirdikdən sonra Bakıya qayıdacaq".
Qeyd edək ki, ilk oyun iyunun 30-da, cavab görüşü isə iyulun 7-də keçiriləcək.
