Bu gün futbol üzrə Azərbaycan Premyer Liqasında VII turun daha iki oyunu keçirilib. Sportnet.az-ın məlumatına görə, günün ilk oyunu Sumqayıtda baş tutub.
Şəhərin eyniadlı komandası sonuncu pillədə qərarlaşan AZAL-ı qəbul edib. Oyunda ilk qolu "təyyarəçilər" vurub. 9-cu dəqiqədə İlqar Ələkbərov fərqlənib. Komandaların hücumlarına baxmayaraq ilk hissə bu hesabla da başa çatıb. 83-cü dəqiqədə "Sumqayıt"da çıxış edən Mirabdulla Abbasov komandasına bir xal qazandıran qolu vurub. Qarşılaşma 1:1 hesabı ilə başa çatıb. Bu nəticədən sonra aktivinə bir xal yazan AZAL turnir cədvəlinin sonuncu pilləsindən xilas ola bilməyib. "Sumqayıt" isə 8 xalla 4-cü pillədə qalıb.
Günün son oyununda isə "Neftçi" və "Kəpəz" komandaları üz-üzə gəlib. Masazır qəsəbəsində yerləşən "Əlincə Arena"da baş tutan görüşə paytaxt klubu daha aktiv başlayıb. 14-cü dəqiqədə Denilson Pereyra gəncəlilərin qapısına yol tapıb. Katalin Tira isə əlavə olunmuş dəqiqələrdə hesabı artırıb. Bununla da "Neftçi" cari mövsümdə ikinci qələbəsini qazanaraq xallarını 6-ya yüksəldib. Bu qələbə flaqmanı turnir cədvəlində 7-ci pillədə qərarlaşan "Zirə"yə və eyni xala malik "Kəpəz"ə yaxınlaşdırıb.
Qeyd edək ki, turun açılış oyununda "İnter" "Zirə"ni qəbul edib və qarşılaşma 1:1 hesabı ilə yekunlaşıb.
VII tura sabah keçiriləcək "Qəbələ" - "Qarabağ" oyunu ilə yekun vurulacaq.
Azərbaycan Premyer Liqası, VII tur
01 oktyabr (şənbə)
19:00. "Neftçi" – "Kəpəz" - 2:0
Qol: Denilson Pereyra, 14. katalin Tira, 90+2
Hakimlər: Ömər Paşayev, Namiq Hüseynov, Mehman Mahmudov, Nahid Əliyev
Əlavə köməkçi hakimlər: Əliyar Ağayev, Rauf Cabbarov
AFFA nümayəndəsi: Nüvər Xasıyev
Hakim-inspektor: Əhmədağa Cabbarov
Masazır. "Əlincə Arena"
17:00. "Sumqayıt" – AZAL - 1:1
Qollar: Mirabdulla Abbasov, 83 - İlqar Ələkbərov, 9
Hakimlər: İnqilab Məmmədov, Elman Musayev, Vaqif Musayev, Azər Əsgərov
Əlavə köməkçi hakimlər: Elvin Əsgərov, Rəvan Həmzəzadə
AFFA nümayəndəsi: Əsgər Əmirəliyev
Hakim-inspektor: Kərim Ağayev
Sumqayıt. "Kapital Bank Arena"
Qeyd edək ki, turun açılış oyununda "İnter" və "Zirə" komandaları üz-üzə gəlib. Oyun 1:1 hesabı ilə başa çatıb.
