Azərbaycan Premyer Liqasının VII turunda AZAL-la görüşün hakimliyi "Sumqayıt" cəbhəsində narazılıq yaradıb.
"Gənclik şəhəri" təmsilçisinin baş meneceri Ceyhun Sultanov Sportnet.az-a açıqlamasında narazılıqlarının əsasən iki epizodla bağlı olduğunu bildirib.
Bunlardan birincisi AZAL-ın ilk qolunda oyundankənar vəziyyətin qeydə alınmaması ilə bağlıdır. Halbuki 9-cu dəqiqədə qapı qarşısına asma edilərkən, qol müəllifi İlqar Ələkbərov ofsaydda olub.
11-ci dəqiqədə isə "Sumqayıt"ın futbolçusu Ayaz Mehdiyev AZAL-ın müdafiəçisi Kamil Hüseynovla mübarizədə yerdə qalıb. Klub hesab edir ki, həmin epizodda Hüseynov Mehdiyevin dizindən vuraraq, yerə yıxıb.
"Sumqayıt" İnqilab Məmmədovun rəhbərlik etdiyi hakimlər briqadasından narazılığını müvafiq qurumlara şifahi formada çatdırıb.
Qeyd edək ki, 1:1 hesablı heç-heçə ilə nəticələnən görüş ərzində digər epizodlarda da meydan sahiblərinin futbolçuları və məşqçilər heyəti etiraz nümayiş etdirib.
