"Oyundan öncə üzərimizdə təzyiq var idi. 4 oyundur məğlub olurduq və bu oyundakı qələbə çox vacib idi. Komanda olaraq əzmkar oyun nümayiş etdirdik, bunun nəticəsində də qələbə qazandıq".
Bunu Sportnet.az-a açıqlamasında "Sumqayıt"ın futbolçusu Amil Yunanov "Neftçi"ni 2:0 hesabı ilə yendikləri Azərbaycan Premyer Liqasının XXIV tur matçından sonra deyib. 63-cü dəqiqədə gözəl qol vuran 24 yaşlı hücumçu davamlı olaraq fərqlənəcəyinə söz verib: "Çempionatın sonuna 4 tur qalıb. Qollarımı vurub, komandama qələbə qazandıracağam. Komandamızın Avropa Liqasına vəsiqə qazanıb-qazanmayacağını zaman göstərəcək. Məncə, qarşıdakı oyunlarda qələbə qazansaq, Avroliqaya vəsiqə qazana biləcəyik. Növbəti turda rəqibimiz AZAL olacaq. AZAL çətin rəqiblərdən biridir. Çalışacayıq ki, bu oyunda da qələbə qazanıb qələbə seriyamızı davam etdirək".
Qeyd edək ki, Amil Yunanov "Neftçi" ilə oyunda son nöqtəni qoyub. İlk qolu isə 60-cı dəqiqədə Bəxtiyar Həsənalızadə vurub.
