"Rəqibimizi çempionluq münasibətilə təbrik edirəm. Bəzi çətinliklərimiz, müdafiədə problemlərimiz var idi. Xüsusilə müdafiənin cinahlarında, İlkin Qırtımov və Slavik Alxasovun yoxluğu öz təsirini göstərdi. Yaxşı ki, vaxtından əvvəl 3-cü pilləni təmin etdik. Yoxsa bizim üçün çətin olardı".
Sportnet.az-ın məlumatına görə, bunu "İnter"in baş məşqçisi Zaur Svanadze evdə "Qarabağ"a 0:3 hesabı ilə uduzduqları Azərbaycan Premyer Liqasının XXVI tur matçından sonra mətbuat konfransında deyib. Gürcüstanlı mütəxəssis növbəti iki oyunda gənc oyunçulara üstünlük verəcəklərini bildirib: "Oyunçular çox yorulublar. Bizdə həm də transfer qadağası var. Gənc oyunçulara şans verilməsi həm də bu cəhətdən əhəmiyyət kəsb edir".
Svanadze Rauf Əliyevin əvəzlənərkən ona etiraz etməsinə də münasibət bildirib: "Elə də ciddi etiraz etmədi. Hamı oynamaq istəyir. Sadəcə, Rauf yorulmuşdu, buna görə onu əvəz etdim".
