"Zirə" ilə Azərbaycan Premyer Liqasının XXVII tur matçında "Neftçi" komandası tərəfindən futbolçu limitinin pozulduğuna dair iddialara AFFA İntizam Komitəsinin iclasında baxılacaq. Bu barədə Sportnet.az-a komitə üzvü və Peşəkar Futbol Liqasının baş direktoru Məlik Həsənov məlumat verib.
O deyib ki, məsələ martın 25-də keçiriləcək toplantıda müzakirəyə çıxarılacaq. Lakin M.Həsənov limitin pozulduğuna dair fikir bildirmək istəməyib.
Qeyd edək ki, "Neftçi" "Zirə" ilə səfər qarşılaşmasında 2:2 hesablı heç-heçəyə nail olub. Lakin 68-ci dəqiqədə qonaq komandanın baş məşqçisi Elxan Abdullayev kapitan Ruslan Abışovu oyundan alaraq, yerinə 7-ci əcnəbi futbolçu Huqo Barqası buraxıb. Bundan 2 dəqiqə sonra səhvini anlayan E.Abdullayev digər legioner İqnasio Herreranı Cavid İmamverdiyevlə əvəzləyib. Bununla da "Neftçi"nin meydandakı əcnəbilərinin sayı yenidən 6-ya enib. Qaydalara əsasən, hər bir komandada oyuna 6 legioner çıxmalıdır. Əks halda, oyunun nəticəsi ləğv olunmalı və limiti pozan komandaya texniki məğlubiyyət verilməlidir.
