Azərbaycan Premyer Liqasının XXVII turu çərçivəsində "Qəbələ" ilə görüşün aprelin 24-ə çəkilməsi "İnter"in planlarını pozub.
Sportnet.az-ın məlumatına görə, paytaxt klubunun kollektivi bu gün komandanın yarımmüdafiəçisi Mirhüseyn Seyidovun toy mərasimində iştirak etməyi planlaşdırıbmış. Lakin Peşəkar Futbol Liqasının görüşün tarixini dəyişdirməsi üzündən heyət üzvləri toya hazırlaşmaq əvəzinə "Qəbələ" ilə matça çıxmalı olublar.
Buna rəğmən, "İnter" kollektivi Seyidovun toyunda iştirak edəcək. Qəbələdəki görüşdən sonra bürünc medallarını alan qonaqlar birbaşa Bakıda keçirilən toy mərasiminə yollanacaqlar.
Qeyd edək ki, təqvimə əsasən oyun aprelin 23-də keçirilməli idi. Lakin Peşəkar Futbol Liqası gümüş və bürünc medalçıların bəlli olmaq ehtimalını nəzərə alaraq, matçı bir gün sonraya təyin edib.
