"Neftçi”nin baş məşqçisi Elxan Abdullayev komandadan göndəriləcək futbolçuları müəyyənləşdirib.
Sportnet.az-ın əldə etdiyi məlumata görə, 47 yaşlı mütəxəssis cari mövsüm başa çatdıqdan sonra 6 futbolçuya qapını göstərməyi qətiləşdirib. Bunlardan 4-ü əcnəbi, 2-si isə yerli oyunçudur.
Abdullayevin "qara siyahı”sına düşənlərdən biri özü tərəfindən heyətə cəlb olunan Boban Baykoviçdir. Serbiyalı qapıçının "çərçivədəki” bacarığı mükafatlar uğrunda mübarizə aparan komandanın tələblərinə uyğun deyil. Baş məşqçinin seçimində yanıldığı digər şəxs isə ukraynalı Kirill Petrovdur.
Digər əcnəbilərə gəlincə, bunlar braziliyalı müdafiəçi Jayro ilə venesuelalı orta xətt oyunçusu Edson Kastilyadır. Sonuncu nadir hallarda meydana çıxdığı halda, "sambaçı” müdafiənin mərkəzində işinin öhdəsindən gələ bilmədiyi üçün yola salınacaq.
Abdullayevin "qara siyahı”sına yer alan yerlilər az oyun vaxtı alan futbolçulardır. Baş məşqçi 35 yaşlı Mahir Şükürovla məşqçilər korpusunun ehtimadını doğrultmayan Murad Ağayevi komandasında görmək istəmir.
Qeyd edək ki, göndəriləcək futbolçularla yanaşı, heyətdə yer alan gənc futbolçulardan bəziləri digər klublara icarəyə veriləcəklər.
