"Qəbələ”nin 13 yaşadək futbolçulardan ibarət komandası beynəlxalq turnirə yollanıb.
Sportnet.az-ın məlumatına görə, Ülfət Mədətovun baş məşqçisi olduğu U-13 İtaliyanın Rimini şəhərində təşkil edilən Flavio Perottinin xatirəsinə həsr olunan 14-cü turnirdə qüvvəsini sınayır. Mayın 22-dək davam edəcək yarışda 24 komanda mübarizə aparacaq. 1-ci mərhələdə A qrupunda yer alan "qırmızı-qaralar” mayın 19-da "Milan”, ardınca "Spal 2013” ilə qarşılaşacaq. "Qəbələ” ertəsi gün "Kapilan Pallo” ilə görüşəcək. Növbəti mərhələdəki rəqiblər isə Azərbaycan komandasının qrupda tutacağı yerdən asılı olacaq.
"Qırmızı-qaralar” Apennin yarımadasına 18 futbolçu ilə yollanıb. Heyətdə Heybət Vəliyev, Emil Umarov, Azər Məmmədhəsənzadə, Səid Ağazadə, İxtiyar Mamıyev, Fuad Əhmədov, İbrahim Ramazanov, Emil Süleymanov, Sərxan Mirzəzadə, Elmir Qələndərov, Sahil Həsənov, Nuqay Rəşidov, Qədir Mustafayev, Elmir Hüseynli, Fərid Kələntərov, Kamil Nəzərli, Namiq Şamilov və Tofiq Bayramov yer alıb.
