"Sumqayıt" klubunun və Azərbaycan millisinin sabiq futbolçusu, hazırda Latviyanın "Olayne" komandasında çıxış edən hücumçu Vüqar Əsgərovun Sportnet.az-a müsahibəsi
- Karyeranı xaricdə davam etdirirsiniz. Sizcə, azərbaycanlı gənc futbolçulara təkliflər niyə gəlmir?
- Mən Latviyada böyümüşəm və idman məktəbini burda bitirmişəm. Lakin Azərbaycanda da oynamışam. Həm burada, həm də Azərbaycanda oynamaq xoşuma gəlir. Gənc futbolçuları xaricə çağırmamalarının səbəbini bilmirəm. Yəqin ki, çağırmaq istəmirlər. Bəlkə də futbolçular qorxurlar, özləri getmək istəmirlər. Ancaq ölkədən kənarda da çıxış etmək lazımdır. Bunun üçün isə çox çalışmaq lazımdır.
- "Qarabağ”ın Çempionlar Liqasındakı çıxışı barədə nə deyə bilərsiniz?
- "Qarabağ”a çox təşəkkür edirəm ki, bu sevinci bizə yaşatdı. Oyunlara çox maraqla baxırdım. Hər matçı izləyirdim. Təkcə "Roma" ilə səfər matçına baxa bilmədim. Çünki başqa bir oyunu - "Bavariya” – PSJ matçını stadiondan izləyirdim. "Qarabağ” Çempionlar Liqasında çox gözəl oyun nümayiş etdirirdi. Gələn mövsüm daha da yaxşı olacağına inanıram.
- Son günlər Azərbaycan futbolunda danışılmış oyunlarla bağlı cəzalar verilməkdədir. Xaricdə yaşayan futbolçu kimi özünüz və ümumiyyətlə, futbolsevərlər Azərbaycan çempionatındakı oyun alqı-satqısı barədə nə düşünürsünüz?
- Məndən inciməyin, bu barədə heç nə deyə bilmərəm. Demək də istəmirəm. Ümumiyyətlə, belə şeylərə fikir vermirəm. Bu haqda danışmasam, yaxşıdır. Həmişə demişəm ki, bu məsələ mənim üçün maraqlı deyil.
- Azərbaycan Premyer Liqasını izləyirsiniz?
- Əlbəttə.
- Hansı komandanı çempionluğa ən real namizəd sayırsınız?
- Mən yaxşı və gözəl futbola azarkeşlik edirəm. Hansı komanda layiqdirsə, o da çempion olsun.
- Hazırda avrokuboklara vəsiqə verən 4-cü yer uğrunda "Sumqayıt" və "Neftçi" arasında ciddi rəqabət gedir. Bu komandalardan hansını daha şanslı görürsünüz?
- Həm "Neftçi”, həm də "Sumqayıt”a hörmətim var. Lakin özüm "Sumqayıt”da çıxış etmişəm. Ona görə də bu komandanın avrokuboklarda iştirak etməsini ürəkdən istəyirəm.
- Milli komandaya Qurban Qurbanov rəhbərlik edəcək. Bu təyinatdan nə gözləyirsiniz?
- Mən həmişə demişəm, yenə də deyirəm: Əcnəbi baş məşqçi milliyə gəlirsə o, böyük karyeraya malik olmalıdır. Fikrimcə, hazırda millidə çıxış edənlər yaxşı futbolçulardır. Riçard Almeydanı xüsusi qeyd etmək istəyirəm. İnanıram ki, o, gənc futbolçulara dəstək olacaq. Qurban müəllim yaxşı baş məşqçidir. Uğurlu olacağına ümidvaram. AFFA-ya təşəkkür etmək lazımdır ki, belə baş məşqçi gətirib.
Təbriz QULİYEV
