Fransanın PSJ klubunun futbolçusu Neymarın Braziliyanın "Santos” klubundan İspaniya təmsilçisi "Barselona”ya keçidi zamanı dələduzluğa yol verdiyi iddiası ilə bağlı məhkəməyə çağrılacaq.
Sportnet.az "El Pais”ə istinadən xəbər verir ki, 26 yaşlı hücumçu ilə yanaşı, Kataloniya klubunun hazırkı rəhbəri Jozep Bartomeu və sabiq prezidenti Sandro Rosel də hakim önünə çıxarılacaq.
Məhkəmə Neymarın transfer hüququnun bir hissəsinin məxsus olduğu DIS fondunun şikayəti əsasında baş tutacaq. Qarşı tərəf futbolçunun "Barselona”ya keçidindən yetərincə qazanac əldə edə bilmədiyindən narazıdır.
Qeyd edək ki, Neymar 2013-cü ilin mayında 57,1 milyon avro müqabilindən "Barselona”ya transfer olunub. Lakin daha sonra transferin real dəyərinin daha yüksək olduğu ortaya çıxıb. Braziliya yığmasının forvardı ötən yay rekord məbləğ qarşılığında – 222 milyon avroya PSJ-yə keçib.